Źjaviłasia infarmacyja, što ŭ vojska pryzyvajuć 26-hadovaha ryma-katalickaha ksiandza z Navahrudka Dźmitryja Malca. Pra heta paviedamili ŭ fejsbuk-supołcy «Kataliki Biełarusi».
Jakaja zakanadaŭčaja teoryja i realnaja praktyka isnavała da hetaj pary ŭ hetym pytańni, patłumačyŭ u fejsbuku katalicki dziejač Arciom Tkačuk:
«Jašče z 90-ch hadoŭ isnavaŭ miechanizm, pavodle jakoha rehulavałasia pytańnie pryzyvu maładych klirykaŭ i śviataroŭ u vojska. Zakanadaŭča nidzie nie było prapisana, što duchoŭniki vyzvalenyja ad hetaha abaviazku. Tamu dva razy na hod biskupy rychtavali admysłovy śpis klirykaŭ i śviataroŭ, jakija padlahali pryzyvu ŭ vojska, i adpaviednyja dziaržaŭnyja orhany davali adterminoŭku. Niekalki hadoŭ tamu ledź nie dajšło dy pryzyvu niekalkich śviataroŭ i klirykaŭ u vajskovyja čaści.
Tady chłopcy atrymali pozvy ŭ vajenkamat, i da samaha apošniaha momantu nie było adterminoŭki. Adnak urešcie jaje ŭsio-taki dali. Jak bačym, ułady vyrašyli skarystacca svaim pravam — i nie dali adterminoŭki ksiandzu Dźmitryju Malcu. Čas pakaža, što budzie ź inšymi klirykami i śviatarami. Chiba što pakul nie idzie razmovy pra pryzyŭ u vojska klirykaŭ miždyjacezijalnaj sieminaryi ŭ Hrodnie. Kali ich pazbaviać adterminoŭki, to dziejnaść navučalnaj ustanovy faktyčna budzie paralizavanaja na paŭtara hoda», — napisaŭ Arciom Tkačuk.
Dźmitryj Malec naradziŭsia 18 červienia 1996 hoda, dyjakanskaje paśviačeńnie pryniaŭ 16 listapada 2019 hoda, słužyŭ u kafiedralnym kaściole ŭ Hrodnie. Apošnim miescam słužeńnia ŭ jakaści vikaryja byŭ Navahrudak. Da 27 hadoŭ, kali zakančvajecca pryzyŭny ŭzrost, jamu zastavałasia mienš za miesiac.
Paviedamlajuć, što Malcu naležyć słužyć u transpartnych vojskach. Pryzyŭ śviatara mienavita ŭ transpartnyja vojski, vierahodna, abumoŭleny tym, što ŭ hetym rodzie vojskaŭ nie abaviazkova brać u ruki zbroju. Jak praviła, vajskoŭcy tut vykonvajuć darožnyja raboty.
Raniej taksama nieaficyjna paviedamlałasia pra toje, što na terminovuju słužbu ŭ vojska buduć pryzyvać i pravasłaŭnych śviataroŭ. Infarmacyi na hety kont na sajcie Aparata ŭpaŭnavažanaha pa spravach relihij i nacyjanalnaściaŭ pakul niama.
Dziaržaŭnyja sacyjołahi: Biełarusy najpierš źviazvajuć svaju dziaržaŭnaść ź Vialikim Kniastvam Litoŭskim24
Kamientary
vrodie słužit
ili...
słužba słužbie rozń?