Kreml znoŭ staŭ strašyć Jeŭropu nastupstvami pieradačy Ukrainie bojeprypasaŭ sa źbiednienym uranam. Ale jeŭrapiejcy spakojnyja
U bok Jeŭropy ruchajecca radyjeaktyŭnaje vobłaka, jakoje źjaviłasia ŭ vyniku źniščeńnia Rasijaj na terytoryi Chmialnickaj i Ciarnopalskaj abłaściej Ukrainy bojeprypasaŭ sa źbiednienym uranam, pastaŭlenych Zachadam, zajaviŭ na siońniašniaj naradzie ŭ Syktyŭkary sakratar Rady biaśpieki Rasii Mikałaj Patrušaŭ.
«ZŠA Ukrainie taksama «dapamahli» — nacisnuli na svaich satelitaŭ i pastavili bojeprypasy sa źbiednienym uranam. Ich źniščeńnie pryviało da taho, što radyjeaktyŭnaje vobłaka nakiravałasia ŭ bok Zachodniaj Jeŭropy. I ŭ Polščy ŭžo zafiksavany rost radyjacyi», — publična biedavaŭ vysokapastaŭleny rasijski siłavik.
Miž tym polski bok ničoha takoha na svajoj terytoryi nie zaŭvažyŭ. Radyjacyjnaja situacyja ŭ Polščy zastajecca, pavodle polskich śpiecyjalistaŭ, u normie.
«Na terytoryi Polščy niama pahrozy zdaroŭju i žyćciu ludziej, a taksama navakolnamu asiarodździu. Polskaje atamnaje ahienctva nie zafiksavała nijakich tryvožnych pakazčykaŭ vymiaralnaj aparatury», — havorycca ŭ paviedamleńni hetaha ahienctva.
Taksama polskija admysłoŭcy zaklikajuć ścierahčysia dezynfarmacyi pra nibyta rost radyjacyi.
Infarmacyju pra «radyjacyju z Ukrainy» sprabavali raspaŭsiudzić i ŭ Słavakii, ale miascovyja ŭłady taksama zapeŭnili, što
«radyjacyjnaja situacyja na terytoryi respubliki standartnaja, nijakich adchileńniaŭ ad danych, što vymiarajucca štodnia, nie zafiksavana».
Kreml aburany pastaŭkami Ukrainie snaradaŭ sa źbiednienym uranam. Ale takija bojeprypasy jość i ŭ Rasii. Što ž chvaluje Maskvu?
Brytanija pieradaść Ukrainie braniabojnyja bojeprypasy sa źbiednienym uranam
«Navošta?» Prapahandysty pryznalisia, što stamilisia apraŭdvać raźmiaščeńnie jadziernaj zbroi ŭ Biełarusi
Ciapier čytajuć
Andreja Pačobuta pamianiali na łukašenkaŭskich špijonaŭ, aryštavanych u Polščy39
Kamientary