Pieramožcaj Jeŭrabačańnia druhi raz stała šviedskaja śpiavačka Loreen. U 2012-m jana vykazała padtrymku Bialackamu
Sioleta muzyčny konkurs prachodziŭ u Livierpuli. Śpiavačcy Loreen ź jaje pieśniaj Tattoo najbolšuju kolkaść bałaŭ prysudziła prafiesijnaje žury, ale i telehledačy acanili vysoka.
U 2012 hodzie Loreen skaryła muzyčny konkurs ź pieśniaj Euphoria. U tym ža hodzie jana paśla svajho vystupu ŭ Viciebsku na «Słavianskim bazary» sustrełasia ŭ šviedskaj ambasadzie ŭ Minsku z žonkaj palitviaźnia Alesia Bialackaha Natallaj Pinčuk, namieśnikam staršyni «Viasny» Valancinam Stefanovičam i niezaležnymi biełaruskimi žurnalistami.
Jana vykazała słovy padtrymki Alesiu Bialackamu i inšym biełaruskim palitźniavolenym, padpisałasia pad pietycyjaj ab zabaronie śmiarotnaha pakarańnia ŭ Biełarusi.
Śpiavačka cikaviłasia ŭmovami ŭtrymańnia Bialackaha ŭ turmie, kolkaściu biełaruskich palitviaźniaŭ, stanam zachavańnia pravoŭ čałavieka, svabodaj vykazvańniaŭ u Biełarusi.
Łaryn nazvała Natallu Pinčuk «vielmi mocnaj žančynaj»:
«Ja razumieju, čamu Aleś vas kachaje… Ja vielmi spadziajusia, što ŭsio naładzicca, što jaho jak najchutčej vypuściać, zyču hetaha ad ščyraha serca. Vielmi škada, što takaja cudoŭnaja siamja razłučanaja, syn u adnym miescy, maci ŭ druhim, a baćka ŭ turmie. Ale vaša zmahańnie spraviadlivaje».
U 2023-m, kali Loreen stała druhi raz pieramožcaj konkursu, Aleś Bialacki, ciapier užo nobieleŭski łaŭreat, znoŭ za kratami.
Druhoje miesca na sioletnim Jeŭrabačańni zaniała Finlandyja (heta kraina atrymała najbolš bałaŭ ad telehledačoŭ), treciaje — Izrail.
U 2022-m pieramohu prysudzili ŭkrainskaj hrupie Kalush Orchestra. Ale praz vajnu konkurs vyrašana było pravodzić u Vialikabrytanii, čyj kalektyŭ tady zaniaŭ druhoje miesca.
Ciapier čytajuć
U Minsku pradajuć dom na vadzie. Kolki prosiać za niezvyčajny abjekt na Čyžoŭskim vadaschoviščy?3
Kamientary