U jakich vypadkach vam sapraŭdy treba dzialicca z mabilnymi dadatkami infarmacyjaj pra vaša miescaznachodžańnie? 

Lohka skazać «tak», kali prahrama abo veb-sajt zapytvajuć danyja pra vaša miescaznachodžańnie, kab chutčej zakryć akno, što ŭspłyvaje, i viarnucca da pracy ci prahladu staronki. Ale varta padumać, z kim vy dzieliciesia hetymi danymi i čamu. Čaściej za ŭsio heta lišniaja infarmacyja, jakaja nasamreč nie patrabujecca dla pracy dadatkaŭ i veb-sajtaŭ, tłumačyć Engaget.

Jak i inšyja vidy asabistaj infarmacyi, danyja ab miescaznachodžańni pradstaŭlajucca kampanijami ŭ jakaści kampramisu: jak praviła, karystalniki achvotna pakazvajuć, dzie jany znachodziacca, dla bolš zručnaha karystańnia; kampanii ŭ svaju čarhu źbirajuć važnuju infarmacyju ab klijentach i (čaściej za ŭsio) pierapradajuć hetyja danyja trecim asobam dla atrymańnia dadatkovaha prybytku.

Hetyja trecija asoby, pa słovach Kupiera Kvincina, daśledčyka biaśpieki z Electronic Frontier Foundation, mohuć być brokierami danych i rekłamadaŭcami, pravaachoŭnymi orhanami, palaŭničymi za hałovami, žurnalistami i inšymi ludźmi (ci kampanijami), chto maje hrošy, kab nabyć hetuju infarmacyju.

Heta adna z pryčyn, pa jakoj my adčuvajem, što našy pryłady nas «słuchajuć». Jany, napeŭna, nie čujuć, jak vy kažacie siabru, što vam vielmi chočacca trochi atrucicca fast-fudam, ale jany viedajuć, što pobač jość «Makdonalds», i prapanujuć zmanlivuju rekłamu bulby-fry.

Tamu, kali vy ŭstaloŭvajecie novyja dadatki, nie zhadžajciesia adrazu na raskryćcio danych ab miescaznachodžańni, navat kali ličycie, što vam niama čaho chavać. Miehan Ijoryjo, staršy juryskonsult Electronic Privacy Information Center, raić paźbiahać vydačy infarmacyi ab miescaznachodžańni, kali heta nie patrabujecca dla pracy prahramy. Heta infarmacyja moža spatrebicca dadatkam z kartami, kab atrymlivać infarmacyju ŭ režymie realnaha času, a voś dadatku dla dastaŭki ježy, imavierna, budzie dastatkova prosta vašaha adrasa. 

Jašče veb-sajty mohuć zapytvać dazvoł na vyznačeńnie miescaznachodžańnia, kab uklučyć takuju zručnuju funkcyju, jak słužba nadvorja, ale jany buduć hienieravać tyja ž vyniki sa značna mienšaj ryzykaj, viedajučy tolki vaš paštovy indeks. Navat z ahavorkaj, što abmien danymi ab miescaznachodžańni ŭ niekatorych vypadkach niepaźbiežny, spadarynia Ijoryjo raić dazvalać dostup tolki tady, kali vam sapraŭdy heta spatrebicca dla vykarystańnia sajta ci prahramy.

Taksama najlepšaja praktyka — adklikać dazvoły na vyznačeńnie miescaznachodžańnia dla lubych dadatkaŭ ci sajtaŭ, jakimi vy bolš nie karystajeciesia abo jakija mahli biazdumna ŭklučyć u minułym. Vy možacie ŭbačyć, jakija dadatki vykarystoŭvajuć danyja ab vašym miescaznachodžańni, zajšoŭšy ŭ nałady vašaha smartfona i pierajšoŭšy na ŭkładku abahulnieńnia miescaznachodžańnia.

Jak praviła, heta možna znajści ŭ naładach pryvatnaści i biaśpieki bolšaści pryład (ci prosta ŭvieści ŭ pošuku naład vašaha smartfona słova «miescaznachodžańnie»). Tam buduć pieraličanyja ŭsie dadatki, jakija majuć dostup da infarmacyi ab vašym miescaznachodžańni, i buduć prapanavanyja varyjanty ŭklučeńnia abo vyklučeńnia. 

Apple, Samsung, Google i inšyja dajuć kankretnyja instrukcyi na svaich sajtach. Takija papularnyja braŭziery, jak Firefox, Chrome, Edge i Safari, taksama dajuć kankretnyja instrukcyi ab tym, jak adklučyć abahulnieńnie miescaznachodžańnia. Uvohule, lepš nie vybirać u braŭziery «zaŭsiody dazvalać» abo padobnyja varyjanty. Zamiest hetaha dačakajciesia akna z zapytam dostupu i, kali heta nieabchodna, abahulvajcie danyja ab miescaznachodžańni ŭ kožnym kankretnym vypadku.

• 29
• 0
• 0
• 0
• 3
• 1
• 1
• 0