Treci dzień suda pa «spravie «Viasny»: pravaabaroncy znoŭ prosiać źniać ź ich kajdanki
U sudzie Leninskaha rajona Minska 10 studzienia praciahvajecca sud «pa spravie «Viasny», fihurantami jakoj źjaŭlajucca staršynia pravaabarončaha centra «Viasna» i nobieleŭski łaŭreat Aleś Bialacki, jaho namieśnik Valancin Stefanovič i kaardynatar kampanii «Pravaabaroncy za svabodnyja vybary» Uładzimir Łabkovič, a taksama Źmicier Sałaŭjoŭ, jaki vymušany byŭ pakinuć Biełaruś, — jaho sudziać zavočna.
Čatyroch pravaabaroncaŭ abvinavačvajuć pavodle č. 4 art. 228 KK (kantrabanda arhanizavanaj hrupaj) i č. 2 art. 342 KK (finansavańnie hrupavych dziejańniaŭ, jakija hruba parušajuć hramadski paradak) — jany nie pryznali vinu ni pa adnym artykule Kryminalnaha kodeksa, jakija im staviacca ŭ vinu.
Napačatku pasiadžeńnia Uładź Łabkovič zajaviŭ chadajnictva ab pierapynku ŭ sudovym pasiadžeńni ŭ suviazi z drennym samaadčuvańniem. Sudździa Zapaśnik vyjšła, kab vyśvietlić danyja ab stanie zdaroŭja pravaabaroncy, bo ŭ sudzie viasnoviec nijakich miedycynskich dakumientaŭ ź SIZA pradstavić nie zmoh. U vyniku, sudździa, źviazaŭšysia z supracoŭnikami SIZA, vyrašyła, što Łabkovič u stanie ŭdzielničać u pracesie. Sudovaje pasiadžeńnie praciahnułasia.
Nahadajem, što ŭ listach na volu Uładź Łabkovič usie paŭtara hoda ŭtrymańnia pad vartaj skardziŭsia na paharšeńnie zdaroŭja, a mienavita na pastajannyja hałaŭnyja boli, biassonicu i panižeńnie zroku.
Na sudzie pravaabaroncaŭ «Viasny» praciahvajuć utrymlivać u zale suda ŭ kletcy ŭ kajdankach. Siońnia Valancin Stefanovič znoŭ patrabavaŭ źniać z pravaabaroncaŭ kajdanki. A sudździa znoŭ nie stała razhladać hetaje chadajnictva, spasłaŭšysia na toje, što tut «padmianiajucca paniaćci miery biaśpieki i miery abarony» i hetaje pytańnie znachodzicca ŭ kampietencyi kanvairaŭ. Tolki niezrazumieła, čym vyklikany takija «miery biaśpieki» ŭ adnosinach da pravaabaroncaŭ, jakija i tak utrymlivajucca za kratami.
Aleś Bialacki padtrymaŭ chadajnictva kalehi i nahadaŭ, što sudziać viasnoŭcaŭ pa palityčnych matyvach. Jon uzhadaŭ, što ŭ 2011 hodzie, kali jaho sudzili papiaredni raz, to ŭ zale suda jon byŭ biez kajdankoŭ.
Kali ź viasnoŭcaŭ u čarhovy raz admovilisia zdymać kajdanki, to Valancin Stefanovič zajaviŭ advod sudu, bo jon parušaje ich pravy. Zapaśnik, čakana, adchiliła hetaje chadajnictva.
Aleś Bialacki na sudzie prapanavaŭ pamianiacca z prakurorom Alaksandram Karalom pryładami dla piśma, bo jany znachodziacca ŭ niaroŭnych umovach — u prakurora noŭtbuk i ručka, a ŭ pravaabaroncaŭ tolki stryžań.
Ciapier čytajuć
Minsk, Varšava, Vilnia — paraŭnoŭvajem, dzie praściej kupić kvateru čałavieku ź siaredniaj zarpłataj1
Kamientary