Litva budzie dabivacca ŭraŭnavańnia sankcyj dla Rasii i Biełarusi, a mytnia zrobić pravierku hruzaŭ stražejšaj
U Litvie robiacca tysiačy sprob abyści sankcyi, uviedzienyja suprać Rasii i Biełarusi. Pradprymalniki z usioj Jeŭropy sprabujuć pradavać padsankcyjnuju pradukcyju praź Litvu. U suviazi z hetym litoŭskaja mytnia robić bolš strohimi pravierki hruzaŭ. Taksama litoŭskija ŭłady buduć dabivacca, kab ekanamičnyja sankcyi suprać Biełarusi zrabili b takimi ž, jak suprać Rasii, piša Delfi.lt.
Na miažy ź Biełaruśsiu hruzavik budzie zajazdžać u śpiecyjalny anhar. Supracoŭniki mytni z dapamohaj renthienaŭskaha aparata pravierać, ci sapraŭdy ŭvozicca toje, što paznačana ŭ dakumientach. U apošni čas časta byvaje naadvarot.
Pačynajučy ź lipienia, mytnia spyniła bolš za 10 000 hruzaŭ, kali adpraŭnikom abo atrymalnikam była Rasija, i 3 100 hruzaŭ, kali adpraŭnikom abo atrymalnikam była Biełaruś.
«Sprabujuć pravieźci zabaronienyja tavary, u tym liku mietały i inšyja», — skazaŭ Darus Žvironas, hienieralny dyrektar Departamienta mytni.
Padazreńni vyklikała i statystyka. Kali Jeŭrasajuz uvioŭ sankcyi suprać Rasii i Biełarusi, rezka pavialičyłasia płyń tavaraŭ z krain — centralnaazijackich sajuźnic Rasii, to-bok Kazachstana, Uźbiekistana, Turkmienistana i Kyrhyzstana. Za dziesiać miesiacaŭ biahučaha hoda ź Litvy ŭ hetyja krainy było ŭvieziena bolš čym udvaja bolš tavaraŭ, čym letaś, i z Centralnaj Azii ŭ Litvu było ŭvieziena amal udvaja bolš, čym letaś.
Mytnia padazraje, što hruz na samaj spravie pryznačany dla Rasii, tolki ŭ dakumientach paznačanaja inšaja kraina. Toje ž — i ŭ advarotnym kirunku.
«U rečaisnaści vidać, što biznes-schiema niełahičnaja i hety tavar sapraŭdy viazuć adniekul bližej: z Rasii ci Biełarusi», — skazaŭ Žvironas.
Časam u dakumientach pakazvajecca, što hruzavik z Uźbiekistana prybyvaje praz dva dni, abo što nibyta małakaštoŭny hruz viazuć ź Siaredniaj Azii.
«Paliŭnyja hranuły, košt jakich nie vielmi vysoki, — sumniŭna, što z-za mahčymaha prybytku ŭ niekalki sotniaŭ jeŭra transpartny srodak pajedzie z krain Centralnaj Azii ŭ Litvu», — adznačyŭ hiendyrektar Departamienta mytni.
Sproby abyści sankcyi iduć i ŭ inšy bok. Robiacca sproby ekspartu zachodnich tavaraŭ ź Litvy ŭ nibyta krainy Centralnaj Azii, choć jość padazreńni, što realnym atrymalnikam budzie Rasija. «Kampresary, byli i inšyja tavarami padvojenaha pryznačeńnia, takija vypadki byvajuć», — skazaŭ jon.
Takaja płyń — ź Jeŭropy ŭ Rasiju — bolš vyhadnaja. Tamu što Rasija ciapier maje vostruju patrebu ŭ roznym pramysłovym abstalavańni, asabliva kali jaho jašče možna vykarystoŭvać u vajennaj pramysłovaści.
«My bačym pavieličeńnie handlovych płyniaŭ praz takija krainy, jak Kazachstan. Adnak dakazać, što tavary iduć u Rasiju praz Kazachstan, niaprosta», — zajaviła ŭ svaju čarhu ministarka finansaŭ Hintare Skajście.
«Tamu pierad mytniaj budzie pastaŭlena zadača znajści peŭnyja zakonnyja sposaby praduchileńnia takoj sproby abyści sankcyi», — skazała Skajście.
Na hetym tydni Rada Jeŭrapiejskaha Sajuza vyrašyła, što ŭsie krainy ES pavinny pašyryć svaje kryminalnyja kodeksy i ŭvieści kryminalnuju adkaznaść za ŭchileńnie ad sankcyj. Litva ž prapanuje ŭsim krainam ES standartavać pravierki hruzaŭ.
Taksama jana prapanuje ŭžyć da Biełarusi tyja ž sankcyi, što i da Rasii.
«Kab nie adbyłosia abychodžańnia sankcyj suprać Rasii pry pieravozcy tavaraŭ abo akazańni pasłuh praź Biełaruś. My vielmi spadziajomsia, što heta źjavicca ŭ dziaviatym pakiecie sankcyj, pieramovy pa jakim pačnucca ŭ kancy hetaha tydnia», — skazała vice-ministarka zamiežnych spraŭ.
Čytajcie taksama:
Jeŭrakamisija prapanavała karać za abychodžańnie sankcyj turemnymi terminami
Sierbija admoviłasia pastaŭlać tavary ŭ Rasiju ŭ abychod sankcyj
«Dačka» MTZ akazałasia ŭ sankcyjnym śpisie Litvy
Pahražaŭ vajskoŭcam raskryć, chto ź ich homaseksuał, kab vypytać sakrety i pradać Ukrainie. Voś za što adyjozny funkcyjanier BRSM atrymaŭ 17 hadoŭ kałonii12
Kamientary