U subotu: Biełaruś – Kazachstan

U subotu, 10 kastryčnika, projdzie matč adboračnaha turniru čempijanatu śvietu pa futbole – 2010 pamiž zbornymi Biełarusi i Kazachstana.

Hulnia adbudziecca ŭ Breście, pačatak a 18-j. Udziełu ŭ matčy nie voźmuć, naprykład, braty Hleby.

Kanał ANT u svajoj niepaŭtornaj niazmušanaj maniery budzie vieści pramuju tranślacyju pajadynku (pačatak u 17:50). Nahadajem, što ŭ Ałmacie biełarusy ŭ Dzień durnia razhramili apanientaŭ ź likam 5:1.

Naŭrad ci vynik subotniaha matču paŭpłyvaje na stanovišča padapiečnych Biernda Štanhie ŭ turnirnaj tablicy: zbornaja Biełarusi, vidać, zastaniecca na 4-m miescy.

Turnirnaje stanovišča: Anhlija – 24 punkty (8 hulniaŭ, bałans miačoŭ 31—5), Charvatyja – 17 (9, 17—12), Ukraina – 15 (8, 14—6), Biełaruś – 10 (8, 15—11), Kazachstan – 6 (8, 10—23), Andora – 0 (9, 3—33).

Zbornaja Biełarusi vyjhrała try matčy (dva ŭ Andory (3:1 – u haściach, 5:1 – doma), adzin – u Kazachstana ŭ haściach(5:1), zhulała ŭničyju z Ukrainaj u Minsku (0:0),

prajhrała Ukrainie ŭ Lvovie (0:1), prajhrała Anhlii ŭ Minsku (1:3) i dvojčy charvatam (1:3 – doma, 0:1 – u haściach).

Najlepšym bambardziram źjaŭlajecca ŭ hetym turniry siarod našych: Cimafiej Kałačoŭ – try hały, na dva miačy ŭ Dźmitryja Viarchoŭcava, Hienadzia Bliźniuka, Siarhieja Karnilenki, pa adnym u Alaksandra i Viačasłava Hleba, Vitala Radzivonava, Paŭła Sitko, Ihara Stasieviča, Leanida Koviela.

***

Zbornaja Anhlii daterminova zavajavała pucioŭku na čempijanat śvietu, što projdzie letam 2010 hoda ŭ Paŭdniova-Afrykanskaj Respublicy.

10 kastryčnika ŭ našaj hrupie sustrenucca Ukraina – Anhlija,

14 kastryčnika: Kazachstan – Charvatyja, Andora – Ukraina, Anhlija – Biełaruś.

Kudy bolšuju cikavaść ujaŭlaje ź siabie subotni matč Ukraina – Anhlija.

Anhlija niematyvanaja, i ŭ vypadku pieramohi zbornaja Ukrainy apiaredzić Charvatyju i zojmie druhoje miesca ŭ hrupie (u apošnim tury našy paŭdniovyja susiedzi hulajuć z Andoraj), što vyviedzie jaje na stykavyja matčy.

Dva hady tamu mienavita zbornaja Charvatyi nie puściła Anhliju na čemmpijanat Jeŭropy, abyhraŭšy ich na «Uembli». Pomsta haduncam Słaviena Biliča była žorstkaj: 4:1 na «Maksimiry», i 5:1 na «Uembli». Ciapier jość unikalnaja mahčymaść adpomścić treci raz, začyniŭšy kalitku ŭ plej-of.

Ale zbornaja Anhlija – pieradusim prafiesijanały, jakija pryvykli ŭ lubym matčy vykładvacca napoŭnicu.

***

U subotu projdzie jašče šerah cikavych dvubojaŭ:

Šviecyja – Danija (1-ja hrupa), u Danii ciapier 18 bałaŭ, u Šviecyi – 15, a ŭ Partuhalii – 13 bałaŭ i prachadnyja matčy ź Vienhryjaj i Maltaj. 14 kastryčnika šviedy doma zhulajuć z Ałbanijaj, Danija – ź Vienhryjaj.

Rasija – Niamieččyna (4-ja hrupa). pieramoha padapiečnych Husa Chidynka praktyčna harantuje pramuju pucioŭku ŭ PAR. Niemcam ža dastatkova ničyi. Na hety matč u Maskvu miełasia prylacieć Anhieła Mierkiel, ale kanclera zatrymali važnyja spravy doma – kaalicyja sa svabodnymi demakratami, sami viedajecie.

Chaciełasia b taksama adznačyć matč Słavakija – Słavienija (3-ja hrupa).

Słavaki lidzirujuć u svajoj hrupie, u ich 19 bałaŭ, i im dastatkova ŭ cubotu ničyi, kab zavajavać pucioŭku ŭ Paŭdniovuju Afryku. Što praŭda, słaviency iduć na druhim miescy (14 bałaŭ) i taksama mrojać pra čempijanat śvietu.

U hetaj ža hrupie zhulajuć 10 kastryčnika Čechija – Polšča. Našyja zachodnija braty choć i iduć na piatym miescy (11 bałaŭ), ale zachoŭvajuć tearetyčnyja šancy na 2-je miesca ŭ hrupie. Jak zrešty i naščadki Jana Husa (u ich 12 bałaŭ). Treciaje miesca ŭ hetaj hrupie zajmaje zbornaja Paŭnočnaj Irłandyi z 14 bałami, ale ŭ ich zastałasia adna hulnia: 14 kastryčnika z Čechijaj u haściach. U nastupnuju sieradu Polšča zhulaje sa Słavakijaj, a San-Maryna – z Słavienijaj.

Pieramoha Bośnii (hrupa 5) u Talinie vyviedzie padapiečnych charyzmatyčnaha Mirasłava Błaževiča ŭ plej-of. Taksama pośpiech maleńkaj krainy.

Pieršaje miesca tut daterminova zavajavała Ispanija (24 bały). Asiečkaj Bośnii moža skarystacca Turcyja, što hulaje ŭ subotu ź Bielhijaj u haściach. U turkaŭ 12 bałaŭ, u baśnijcaŭ – 16.

14 kastryčnika, darečy, u hetaj hrupie projdzie matč, što maje palityčnaje značeńnie: Turcyja – Armienija. Matč maje naviedać prezident Armienii Sierž Sarhsian, voś Abdułu Hiula hod tamu ŭ Jerevanie aśvistali.

• 0
• 0
• 0
• 0
• 0
• 0
• 0
• 0