«Biełsat»: Ahient HUBAZiKa moh spampavać bazu danych ČKB, u ruki siłavikoŭ trapili kantakty 10 000 infarmataraŭ
«Biełsat» śćviardžaje, što ŭ telehram-kanała «Čornaja kniha Biełarusi» jość baza infarmataraŭ, jakuju, miarkujuć žurnalisty, ahient HUBAZiKa spampavaŭ. U bazie, pavodle «Biełsata», było kala dziesiaci tysiač čałaviek.
Jak raspaviadaje «Biełsat», ČKB mieła nie adzin, a šeść telehram-kanałaŭ. Asnoŭny — «Biełaruś» — i piać rehijanalnych. Kab bačyć usie paviedamleńni, była stvoranaja adminka, kudy ściakałasia infarmacyja z usich čat-botaŭ. Ałharytm aŭtamatyčna stvaraŭ novy čat u interfiejsie adminki — nik, data pierapiski i nazva telehram-kanała, ź jakoha było paviedamleńnie.
Ale, što važna, adminka viedała i zapaminała ŭnikalny dla kožnaha karystalnika ID-numar. Jon byŭ pryviazany da kožnaha z čataŭ. Hety ID-numar pryviazany da karystalnika. Choć praź jaho niemahčyma atrymać numar ci imia karystalnika naŭprost, kali čałaviek prymaŭ minimalnyja zachady biaśpieki, jon časta daje mahčymaść daviedacca jaho sapraŭdnyja danyja — tut my niekali tłumačyli, jakim čynam.
Usie razmovy ź infarmatarami (paviedamleńni, jakija jany dasyłali, u tym liku svaje danyja, i adkazy supracoŭnikaŭ ČKB) možna ličyć bazaj danych ČKB.
Pavodle žurnalistaŭ, adminka nadalej pracuje, i supracoŭniki «Infapojnta» majuć da jaje dostup.
«Biełsat» pryvodzić ciapierašniuju pierapisku z ČKB, dzie nibyta zaniepakojeny infarmatar pytajecca, jakuju infarmacyju jany źbirajuć i ci treba jamu chvalavacca. Administratar ČKB adkazaŭ: nie chvalujciesia, vašy danyja ŭ biaśpiecy, my źbirajem tolki juzier-nejmy. «Biełsat» źviartaje ŭvahu, što administratar uvodzić u zman: adminy bačać łahin i ŭnikalny ID.
To-bok administratar piša biełarusu, jaki, mahčyma, znachodzicca ŭ Biełarusi, što niebiaśpieki niama, zamiest taho, kab papiaredzić pra jaje.
Ahient HUBAZiKa mieŭ dostup da adminki ČKB. «Jakija jašče patrebnyja dokazy taho, što HUBAZ maje poŭnuju bazu kantaktaŭ? Naiŭna ličyć, što jon nie skapiravaŭ poŭnuju bazu kantaktaŭ i nie padzialiŭsia dostupam z kalehami, kab tyja manitoryli jaje štodnia ŭ režymie anłajn», — kaža žurnalist Ihar Kulej.
Pavodle «Biełsata», 23 maja 2021 hoda, u dzień pasadki samalota, na jakim lacieŭ Raman Pratasievič, supracoŭnik HUBAZiKa Artur Hajko nie byŭ raskryty. Jon mieŭ dostup da bazy jašče da 12 lipienia.
Paśla pasadki samalota staryja łahiny adminki byli vydalenyja, ale Artur Hajko atrymaŭ novy dostup. Jon jašče 1,5 miesiaca byŭ administrataram ČKB. Usie ličyli, što infarmacyja vyciekła ad Pratasieviča i Sapiehi.
«Biełsat» vykazvaje mierkavańnie, što nie ŭsich ludziej jašče zatrymali. Tych, chto pisaŭ, pad svaimi realnymi proźviščami ci sa svaimi fota — vierahodna, tak. Ich było prosta identyfikavać. Tych, chto dasyłaŭ zdymki pratakołaŭ ci sudovych pastanoŭ, taksama niaciažka vyličyć — tam jość ich danyja.
A voś jość jašče tyja, nad jakimi visić pahroza. Hetyja ludzi mieli ananimny telehram i nie dasyłali asabistyja źviestki ČKB. Usio, što viedaje pra ich HUBOP, — ich unikalny ID-numar. Ale heta moža być pytańniem času, kali ich raskryjuć.
«Biełsat» śćviardžaje, što im udałosia padličyć, kolki ludziej było ŭ bazie ČKB. Kolkaść čałaviek, jakija choć raz napisali choć u adzin z šaści telehram-botaŭ ČKB, «nie mienšaja za 10 tysiač asobaŭ», i, jak śćviardžaje «Biełsat», u ich jość dakumientalnyja paćvierdžańni hetamu.
Kamientary
Daj małomu siakierku - jon zkinie jaje źvierchu.
Nie možna daviarać hetym małym.