Kaho Minkultury ŭklučyła ŭ rejestr arhanizataraŭ kancertaŭ i festaŭ?
Pa novych praviłach arhanizoŭvać kancerty i imprezy mohuć tolki tyja, chto ŭklučany ŭ rejestr arhanizataraŭ kulturna-vidoviščnych mierapryjemstvaŭ. Składaje jaho Ministerstva kultury. Pahladzieli, chto ŭžo jość u śpisie.
Z najbolš viadomych ahienctvaŭ u rejestry — «Atam Intertejmant». Heta ahienctva pryvoziła ŭ Minsk suśvietnych zorak — Depeche Mode, Linkin Park, Lana Del Rey, 30 Seconds to Mars. Jano ž pravodziła fiestyval «MOST».
Razam z tym hety ž arhanizatar źbiraŭsia pryvieźci rasijskich artystaŭ na kancert u Minsk 8 žniŭnia 2020 hoda napiaredadni vybaraŭ — ale kancert byŭ admienieny, bo ludzi pačali masavać pisać artystam z prośbaj admovicca ad vystupleńnia. Samo ahienctva tady kamientavała, što biaspłatny kancert płanavali rabić nie za dziaržaŭnaje finansavańnie i što heta byŭ pryvatny zakazčyk, raskryvać jakoha jany nie mohuć.
Ahienctva «Anbrejkbł», jakoje taksama akredytavana Minkultam, u hetym hodzie arhanizuje kancert śpiavački MakSim, «Elitkancert» — zaprašaje Volhu Buzavu i Stasa Michajłava.
Kampanija Soundcafe pravodziła fiestyvali «Viva Brasłaŭ» i «Vulica Ježy».
U rejestry i ahienctva «Evientus». Heta jano ŭ kastryčniku źbirajecca pryvieźci ŭ Minsk rasijskaha śpiavaka Shaman, jaki vypuściŭ patryjatyčna-revanšysckija chity «Ustaniem» i «Ja ruski».
U śpis uniesieny teatr «TryTfarmaT», dzie za mastackaha kiraŭnika aktrysa Viera Makiej-Palakova, žonka ministra zamiežnych spraŭ.
Uklučany śpiavak Alaksandr Saładucha, jaki niadaŭna na STB prezientavaŭ pieśniu, pryśviečanuju chlebarobam, i śviatočnaje ahienctva śpiavački Ułady.
Akredytavany taksama muzyčny pradziusierski «Załatyja hałasy» — jon adkazny za kulturna-spartyŭny fiestyval «Vytoki», dzień horada, kancerty niekatorych biełaruskich artystaŭ.
Usiaho ŭ śpisie ciapier 85 arhanizacyj i pradprymalnikaŭ. Pakul tam niama, naprykład, viadomaha minskaha kłuba «Repablik» (ale rejestr abnaŭlajecca).
Nahadajem, u rejestr buduć uklučać jurydyčnych asob (akramia dziaržorhanaŭ i dziaržarhanizacyj), zamiežnyja abo mižnarodnyja arhanizacyi, u tym liku jakija nie źjaŭlajucca jurydyčnymi asobami.
Kab trapić u śpis, treba nakiravać zajavu ŭ Minkult i nieabchodnyja dakumienty. Ich razhledzić respublikanskaja ekśpiertnaja kamisija pry Minkulcie.
Dekłarujecca, što kamisija budzie ŭličvać mastacki ŭzrovień kulturna-zabaŭlalnych mierapryjemstvaŭ, praviedzienych arhanizataram. A taksama «źviernie asablivuju ŭvahu na najaŭnaść faktaŭ admieny mierapryjemstvaŭ biez uvažlivych pryčyn, ich praviadzieńnia z parušeńniem patrabavańniaŭ Kodeksa ab kultury, inšych aktaŭ zakanadaŭstva, parušeńnia terminaŭ vypłaty hrašovaj kampiensacyi koštu ŭvachodnaha bileta, jaho niavypłaty abo vypłaty ŭ niapoŭnym pamiery».
Hetaje praviła nie datyčycca mierapryjemstvaŭ, paśviedčańnie na prava arhanizacyi i praviadzieńnia jakich vydadziena da 1 žniŭnia 2022 hoda.
Tyja, kaho nie ŭklučać u śpis, nie buduć mieć prava pravodzić mieraprapryjemstvy.
Kamientary