Unačy 6 lipienia na miažy ź Litvoj połackija pamiežniki abstralali aŭtamabil z čatyrma biełarusami, jakija «sprabavali schavacca ŭ lasnym masivie na aŭtamabili» i nie reahavali na patrabavańni spynicca, paviedamlaje Dziaržpamiežkamitet. Usie čaćviora zatrymanyja, heta ŭradžency Pastaŭskaha rajona ad 23 da 42 hadoŭ.
Jak śćviardžaje pres-słužba DPK, mašynu pamiežniki abstralali, kab prymusić tych, chto ŭ joj znachodziŭsia, spynić ruch. Usiaho siłaviki nibyta zrabili adzin papieradžalny streł u pavietra i siem strełaŭ pa kołach aŭtamabila.
Jak dadajuć u viedamstvie, na miescy zdareńnia i pa miescy žycharstva zatrymanych siłaviki vyjavili ciepłavizar, prybor načnoha bačańnia, šeść radyjostancyj i navihatar. Ź jakoj metaj jany chacieli nielehalna pierabracca praź miažu — pakul nie paviedamlajecca.
«U dačynieńni da ŭsich pravaparušalnikaŭ pačaty administracyjny praces za zamach na niezakonnaje pierasiačeńnie miažy, parušeńnie pamiežnaha režymu i niepadparadkavańnie zakonnym patrabavańniam supracoŭnikaŭ orhanaŭ pahransłužby. Paśla vyśviatleńnia ŭsich abstavinaŭ dziejańniam mužčyn budzie dadziena pravavaja acenka», — piša pres-słužba DPK.
Kamientary