NYT: U ZŠA ŭchvalili pieradaču Ukrainie reaktyŭnych sistem załpavaha ahniu
Administracyja prezidenta ZŠA Džo Bajdena ŭchvaliła adpraŭku va Ukrainu reaktyŭnych sistem załpavaha ahniu vialikaj dalokaści, što moža dapamahčy Ukrainie ŭ abaronie svajoj terytoryi na Danbasie. Pra heta paviedamlaje The New York Times sa spasyłkaj na amierykanskich čynoŭnikaŭ.
Ab pieradačy zbroi, chutčej za ŭsio, budzie abvieščana na nastupnym tydni, skazaŭ čynoŭnik na ŭmovach ananimnaści.
Uzbrajeńnie budzie ŭklučać mabilnyja rakietnyja ŭstanoŭki, jakija mohuć stralać značna dalej, čym puskavyja ŭstanoŭki, jakija ciapier vykarystoŭvaje Ukraina, piša vydańnie.
Choć aficyjnyja asoby nie raspajali padrabiaznaści pra toje, jakija mienavita typy rakiet pieradaduć Złučanyja Štaty, Pientahon čaściej za ŭsio vykarystoŭvaje M31 GMLRS (Guided Multiple Launch Rocket System). Heta vysakadakładnaja zbroja sa spadarožnikavym naviadzieńniem, jakaja niasie prykładna takuju ž kolkaść vybuchoŭki, jak i 500-funtovyja avijabomby.
Taksama ZŠA płanujuć uklučyć u nastupny pakiet uzbrajeńniaŭ dla Ukrainy reaktyŭnyja sistemy załpavaha ahniu HIMARS, jakija pierasoŭvajucca na šasi kołavych hruzavikoŭ.
Pres-sakratar Pientahona Džon Kirbi ŭ piatnicu admoviŭsia paćvierdzić, što rašeńnie pieradać puskavyja ŭstanoŭki było pryniataje.
Aryštavany 75‑hadovy Źmicier Sańko — vieteran-vydaviec3
Kamientary