Brytancy majuć pieradać Ukrainie mahutnyja supraćkarabielnyja rakiety «Harpun». Što pra ich viadoma?
Łondan rychtujecca pieradać Ukrainie supraćkarabielnyja rakiety, paviedamlaje The Times.
Pa słovach brytanskaha premjer-ministra Borysa Džonsana, jany spatrebiacca dla abarony Adesy.
U Vialikabrytanii miarkujuć, što spynieńnie rasijskaha nastupleńnia pad Kijevam — zasłuha brytanska-šviedska-finskich hranatamiotaŭ NLAW (supraćtankavyja rakiety). Ciapier vojski Rasii kancentrujucca na poŭdni, tamu Ukrainie patrebny supraćkarabielnyja rakiety, kab nie dazvolić rasijanam vysadzić desant pad Adesaj.
Razmova moža iści pra pastaŭki amierykanskich rakiet Harpoon.
«Harpun» — pravieranaja supraćkarabielnaja rakieta, adna z samych efiektyŭnych. Jaje vyrablajuć na pradpryjemstvach karparacyi «Boinh». Takuju nazvu zbroja atrymała pa asacyjacyi sa staroj rybackaj pryładaj.
Heta małahabarytnaja rakieta, jaje chutkaść mienšaja za chutkaść huku. Jana maje braniabojnuju bajavuju častku vahoj 225 kiłahramaŭ, dalokaść dziejańnia — ad 90 da 280 kiłamietraŭ.
Rakieta isnuje ŭ niekalkich varyjantach — avijacyjnaha baziravańnia (AGM-84), karabielnaha (RGM-84) i dla zapusku z padvodnych łodak (UGM-84).
«Harpun» moža atakavać dvuma sposabami: haryzantalna, ruchajučysia paralelna vadzie na vyšyni dva-čatyry mietry ci rabić manieŭr, padymajučysia na vyšyniu da 1800 mietraŭ i pikirujučy na cel. Druhi sposab byŭ raspracavany dla ataki na padvodnyja łodki, jakija ŭspłyli, i nievialikija manieŭranyja katary.
Ukraina napiaredadni vajny raspracavała ŭłasnuju supraćkarabielnuju rakietu «Nieptun», prajšli jaje vyprabavańni, ale pakul niajasna, ci «Nieptuny» paśpieli zastupić na bajavoje dziažurstva.
Kamientary