Biełaruski rubiel ŭmacoŭvajecca. Čamu tak adbyvajecca i ci adkruciać ceny?
Pa kursie Nacbanka adzin dalar ciapier kaštuje mienš za try rubli. «Naša Niva» spytała ŭ ekanamista, što paŭpłyvała na ŭmacavańnie nacyjanalnaj valuty i jak heta adabjecca na cenach.
Ekśpiert BEROC Nastaśsia Łuzhina adznačaje, što ŭmacavańnie biełaruskaha rubla adnosna dalara i jeŭra ŭ pieršuju čarhu źviazanaje z dynamikaj rasijskaha rubla.
«Jak i ŭ situacyi z padzieńniem, jakoje nazirałasia na pačatku vajennaha kanfliktu, kurs našaj valuty paŭtaraje trajektoryju ruchu rasijskaha rubla, ale tempy mohuć adroźnivacca. Adnak kazać ab viartańni da kursu na pačatak lutaha ŭsio ž nie prychodzicca. Rasijskaja valuta ciapier znachodzicca ŭ zonie niavyznačanaści, rubiel nielha nazvać stabilnaj valutaj. Zastajecca šmat faktaraŭ, jakija mohuć źmianić situacyju», — adznačaje ekśpiert.
Umacavać kurs rasijskaha rubla ŭdałosia šmat u čym dziakujučy žorstkim abmiežavańniam z boku Centrabanka RF.
«U pieršuju čarhu mienavita dziakujučy vykarystańniu administracyjnych ryčahoŭ Rasii ŭdałosia damahčysia stabilizacyi kursu. Inšymi faktarami, jakija taksama akazvajuć svoj upłyŭ na rubiel, možna nazvać vysokija ceny na naftu i niekatoryja pazityŭnyja sihnały adnosna situacyi va Ukrainie», — ličyć ekanamistka.
Tym nie mienš pazityŭnaja dynamika jašče nie kaža ab viartańni davieru da rasijskaha rubla. Prykład hetaha možna ŭbačyć u biełaruskich bankach, jakija pa-raniejšamu hatovyja kuplać rubli pa mocna zanižanym kursie. Heta śviedčyć ab nizkim popycie na najaŭnym rynku.
Stabilizacyja kursu biełaruskaha rubla ŭ dačynieńni da dalara i jeŭra moža stanoŭča paŭpłyvać na ceny impartnych tavaraŭ.
«U niekatorych vypadkach, mahčyma, ubačym navat źnižeńnie pieršapačatkova istotna zavyšanaj cany, choć naŭrad ci heta budzie paŭsiudna. Na biahučy momant niama padstaŭ kazać pra toje, što devalvacyjnyja čakańni ŭ bližejšaj pierśpiektyvie prykmietna palepšacca. Imparciory zakładvajuć u košt tavaru dadatkovyja ryzyki, źviazanyja ź niestabilnaściu kursaŭ valut. U karotkaterminovym pieryjadzie jany buduć praciahvać heta rabić», — kaža Nastaśsia Łuzhina.
Jak maskoŭski Centrabank zdoleŭ padniać kurs rasijskaha rubla
«Kala 70% ekspartu ŭ ES — pad sankcyjami». Što čakaje biełaruskuju ekanomiku
«Nabirała vadu z unitaznaha bačka dla hatavańnia, myćcia». Hanna Bond ščyra raspaviała pra ciažkaje dziacinstva13
Kamientary