Adna pastanova 991 zdolnaja pierakreślić vysiłki dziesiaci pijar-ahienctvaŭ. Piša ŭ svaim błohu na NN Alaksandr Kłaskoŭski.
Hadavy kantrakt biełaruskaha ŭradu ź pijar-ahienctvam łorda Beła skončyŭsia, paviedamlaje «EU Observer». Łord, kaniečnie, profi, ale nijakich cudaŭ za hetyja 12 miesiacaŭ jon nie zrabiŭ.
Tak, farmalna hety as pijaru paspryjaŭ, kab źjaviŭsia šerah intervju z Łukašenkam u sapraŭdy aŭtarytetnych zachodnich vydańniach. Ale, kładučy ruku na serca, arhanizavać takija publikacyi było b niaciažka i biez vysiłkaŭ «Bell Pottinger Group». Bo cikavaść zachodniaj presy da «apošniaj dyktatury Jeŭropy» mienavita ciaham apošniaha hodu i tak padskočyła. I pryčynaj stała toje, što Brusiel raspačaŭ mudrahielistuju hieapalityčnuju apieracyju, skiravanuju na vyciahvańnie Biełarusi z rasijskaj zony ŭpłyvu.
Nu a svoj imidž hieroj intervju abmaloŭvaŭ sam — ułasnymi vykazvańniami. Ź jakich vynikała, što zadraŭšy štany biehčy za demakratyčnymi standartami Minsk nie razhonicca. I ŭžo hetyja teksty nijaki łord pierapisać nie moh.
Ci voś taki momant. Kažuć, mienavita spadar Beł paraiŭ biełaruskamu kiraŭniku raz-poraz źjaŭlacca pierad abjektyvami z małodšym synam. Pryjom zrazumieły: źmiakčyć vobraz žorstkaha aŭtakrata — maŭlaŭ, ništo čałaviečaje jamu nie čužoje. Ale ž u vyniku atrymałasia sami viedajecie što. I łordu zastajecca tolki razvodzić rukami.
Samaje ž hałoŭnaje — pobač ź intervju jeŭrapiejskija haziety davali abjektyŭnyja artykuły pra biełaruskuju rečaisnaść. Nivodnaje salidnaje zachodniaje vydańnie nie apuścicca da prymityŭnaha ŭchvaleńnia biełaruskaj madeli ni za jakija pierniki. Mienavita tamu, što šanuje svaju reputacyju.
Ujavicie, nu chto b staŭ čytać «Fajnenšł tajms», kab tam raz-poraz davali prapłočanyja razvaroty z uchvaleńniem kamandna-administratyŭnaj ekanomiki? Heta chiba tolki rasijskich pravincyjnych žurnalistaŭ, dobra pačastavaŭšy, možna vazić pa roznych paciomkinskich vioskach, kab potym usłaŭlali biełaruski ziamny raj.
I narešcie, apošniaje. Adzin durałomny cyrkular zdolny lohka pierakreślić hadavyja vysiłki samaha prafiesijnaha pijar-ahienctva. Inviestar sto razoŭ padumaje, pierš tym sovacca ŭ krainu, dzie źjaŭlajucca narmatyŭnyja akty kštałtu pastanovy 991.
Mudry car, kaniečnie, vyhadna padaŭ siabie pierad naiŭnaj častkaj elektaratu, vyściebaŭšy za tuju pastanovu bajar-hałavaciapaŭ. Ale ž zamiežniki na takija tannyja imprezy nie viaducca.
Ciapier čytajuć
U harach Kyrhyzstana z drona adšukali cieły źnikłych biełaruskich alpinistaŭ8
Kamientary