Što viadoma pra tajamničy ŭzłom BIEŁTA, paśla jakoha aryštavali namieśnika dyrektara pa ideałohii?
Niadaŭna my paviedamlali pra dziŭnuju kryminalnuju spravu suprać niadaŭniaha namieśnika hiendyrektara Biełaruskaha telehrafnaha ahienctva Siarhieja Adziarychi. Jaho tajamničaje źniknieńnie supracoŭniki źviazali z takim ža tajamničym uzłomam siervieraŭ BIEŁTA. Supracoŭniki ahienctva ličać, što za ŭzłomam stajaŭ niechta z byłych rabotnikaŭ. Tolki ŭ 2020 ź BIEŁTA zvolniłasia nie mienš jak 15 čałaviek, i hetaja tendencyja praciahvajecca. Raskazvajem, što adbyvajecca.
Tajamničy ŭzłom adbyŭsia amal u hadavinu vybaraŭ — u žniŭni 2021-ha.
«Dzieści 12 žniŭnia zdaryŭsia kałaps — ludzi pryjšli na rabotu, a na ekranach niezrazumiełyja nadpisy i ničoha nie adkryvajecca, — raskazvaje adzin z supracoŭnikaŭ ahienctva. — Spačatku paviedamili našym prahramistam — jany pačali vyśviatlać, u čym prablema, a pad kaniec pracoŭnaha dnia vydali vysnovu: «padobna na kibier-ataku i virus».
Žurnalistam, jakija adkazvali za teksty skazali, što nielha ŭklučać kampjutary, na jakich Windows, a nie Linux. Taksama nam zabaranili zachodzić u sistemu IBM lotus, jakoj my karystalisia. My vykarystoŭvali jaje jak unutranuju poštu, taksama tam byŭ śpis kantaktaŭ usich supracoŭnikaŭ z fota, telefonami.
U vyniku, chto karystaŭsia Linux, toj praciahnuŭ pracavać, chto nie — adpraŭlaŭ teksty z ułasnaj elektronnaj pošty na poštu redaktaraŭ. Pisali navat z mabilnikaŭ, bo kampjutarami nielha ž było karystacca», — paćviardžaje heta druhi.
«Što adbyvałasia ź siervierami žurnalistam nie raskazvali, za heta adkazvaŭ adździeł, padparadkavany Adziarychu», — dadaje treci.
«U vyniku paru dzion ničoha nie pracavała. Pryciahnuli śpiecyjalistaŭ z KDB i AAC. Ale ničoha nie vyjšła «vylečyć». Pa fakcie prosta ŭsio adfarmatavali. Infarmacyja na kampjutarach supracoŭnikaŭ źnikła, a asnoŭny archiŭ udałosia častkova adnavić. Adziarycha skazaŭ, što «nas uzłamali», što «vinavaty niechta sa svaich», ale ŭ vyniku aryštavali jaho samoha», — kaža nam biełtaviec.
Ale što na hetych siervierach mahło być takoha kaštoŭnaha?
«Što zaŭhodna mahło być: mahli być zapisy z Akreścina, mahła być sustreča Łukašenki z Babarykam, Cichanoŭskim i inšymi ŭ SIZA. Heta ž niechta mantavaŭ, adpaviedna, niedzie zachoŭvałasia, aproč siervieraŭ MUS, — ličyć rabotnik BIEŁTA. — Byli ludzi, što zdymali pastanovačnyja kadry na akcyjach — zbroju, ałkahol i hetak dalej. Jany pracavali ŭ asobnym pakoi. A mahło i ničoha važnaha tam nie być — prosta sa złości».
«Na hetym sierviery byli fota i videa z maršaŭ pratestu, pa jakich, u tym liku, siłaviki identyfikoŭvali pratestoŭcaŭ u nastupnym. Byli i fota samich supracoŭnikaŭ BIEŁTA na maršach. My fotkalisia i skidali na pamiać u archiŭ. Moža być, niechta vyrašyŭ heta pačyścić, nie viedaju», — ličyć inšy.
«Kali za hetyja paŭhoda ničoha nidzie nie ŭspłyło, imavierna, ataka była niaŭdałaja. U lubym razie, z demanstratyŭnaj błakiroŭkaj rabočych kampjutaraŭ «cicha» vydalić ci vyhruzić archivy niemahčyma», — kaža supracoŭnik.
Ahułam, uspaminajuć biełtaŭcy, sa žniŭnia 2020-ha z ahienctva zvolniłasia 15-20 čałaviek. Zvalnieńni praciahvajucca, kažuć našy surazmoŭcy. Sychodziać žurnalisty, źviazanyja ipatekaj, źjazdžajuć z krainy fatohrafy. Tolki na hetym tydni, maŭlaŭ, zvolniłasia dva čałavieki.
«Ale jak. Raskazvajuć, što ich vyklikali da Akułovič, a taja skazała pisać zajavy, zdajecca było tak», — kaža nam supracoŭnik arhanizacyi.
Čytajcie taksama: Namieśnik hiendyrektara BIEŁTA pa ideałohii źnik z radaraŭ u vieraśni, a znajšoŭsia ŭ sudzie. Padrabiaznaści
Ciapier čytajuć
Pahražaŭ vajskoŭcam raskryć, chto ź ich homaseksuał, kab vypytać sakrety i pradać Ukrainie. Voś za što adyjozny funkcyjanier BRSM atrymaŭ 17 hadoŭ kałonii
Kamientary