Štraf vyklikany admovaj Polščy vykonvać rašeńni vyšejšych sudoŭ pa reformie svajoj sudovaj sistemy. Luksiemburh źviarnuŭ uvahu Varšavy na kaštoŭnaści JeC i zaklikaŭ skasavać dyscyplinarnuju pałatu Viarchoŭnaha suda.
Sud Jeŭrapiejskaha sajuza ŭ Luksiemburhu ŭ sieradu abaviazaŭ Polšču płacić štodzionny štraf, suma jakoha — 1 miljon jeŭra. Heta vyklikana admovaj aficyjnaj Varšavy vykonvać rašeńni suda ES pa reformie polskaj sudovaj sistemy. Sud patłumačyŭ štraf nieabchodnaściu paźbiehnuć «surjoznaj i niepapraŭnaj škodaj pravaparadku ES, a taksama kaštoŭnaściam, na jakich zasnavany sajuz», paviedamlaje Deutsche Welle.
Siarod inšaha, havorka idzie ab nieabchodnaści spynić dziejnaść dyscyplinarnaj pałaty Viarchoŭnaha suda. Jaje praca niesumiaščalnaja z normami ES ab niezaležnaści i biesstaronnaści sudovaj ułady, pakazvajecca ŭ rašeńni.
U pačatku miesiaca Kanstytucyjny sud (KS) Polščy pryznaŭ prymat zakanadaŭstva hetaj krainy nad zakonami Jeŭrasajuza. Asobnyja pałažeńni zakanadaŭstva JeC niesumiaščalnyja z Kanstytucyjaj Polščy, pastanaviŭ sud.
Rašeńnie vyklikała žorstkuju krytyku Brusiela. Jeŭrakamisija pačała rychtavać sudovy pazoŭ da Varšavy. Polski premjer-ministr Matevuš Maraviecki ŭ adkaz abvinavaciŭ ES u šantažy. Kiraŭnik urada jašče ŭ sakaviku zaklikaŭ Kanstytucyjny sud vynieści rašeńnie ab pieravazie polskaj kanstytucyi nad jeŭrapiejskim zakanadaŭstvam.
Kamientary