U Homieli likvidavali «Tałaku» — najstarejšuju krajaznaŭčuju arhanizacyju horada
U Homielskim abłasnym sudzie 15 vieraśnia adbyŭsia razhlad hramadzianskaj spravy pavodle pazova hałoŭnaha ŭpraŭleńnia justycyi Homielskaha abłvykankama da homielskaj moładzievaj krajaznaŭčaj hramadskaj arhanizacyi «Tałaka» — ab jaje likvidacyi. Sudździa — Taćciana Aziemša.
Pavodle pazovu ŭładaŭ, zhodna z zakonam «Ab mierach pa praduchileńni lehalizacyi dachodaŭ, atrymanych złačynnym šlacham, finansavańnia terarystyčnaj dziejnaści i finansavańnia raspaŭsiudžvańnia zbroi masavaha paražeńnia» hramadskija abjadnańni abaviazany štohod davać dakumienty pra svaju dziejnaść, u tym liku — pra pastupleńnie i vydatkoŭvańnie hrašovych srodkaŭ i inšaj majomaści. «Tałaka» nibyta hetaje patrabavańnie nie vykanała, piša «Radyjo Svaboda».
U pazovie ŭkazvajecca, što na adras «Tałaki» nibyta vynosili piśmovaje papiaredžańnie — padstavaj pasłužyli parušeńni, jakija ŭ arhanizacyi nie likvidavali.
Staršynia arhanizacyi Piotr Całka ŭ sudzie pryznaŭ pazoŭnyja patrabavańni i chadajničaŭ, kab sud daŭ mahčymaść na praciahu dvuch dzion pradastavić nieabchodnyja dakumienty. Pry hetym adznačyŭ, što «Tałaka» nie viała ekanamičnuju dziejnaść. U adkaz na heta pradstaŭnik pazoŭnika zajaviŭ, što času dla pradstaŭleńnia dakumientaŭ było dastatkova.
Sud pastanaviŭ zadavolić patrabavańni pazoŭnika i likvidavać arhanizacyju.
Homielskaja moładzievaja krajaznaŭčaja hramadskaja arhanizacyja «Tałaka» isnavała z 1986 hoda i zajmałasia raźvićciom nacyjanalnaj kultury: adradžeńniem staražytnych biełaruskich narodnych abradaŭ, zboram falkłoru, rekanstrukcyjaj aŭtentyčnych śviataŭ. Abjadnańnie papularyzavała kulturu, historyju i krajaznaŭstva.
Ad siaredziny lipienia pa ŭsioj Biełarusi adbyvajecca masavaja likvidacyja niedziaržaŭnych arhanizacyj. Pad pahrozaj isnavańnie dziasiatkaŭ aśvietnickich, pravaabarončych, dabračynnych, spažyvieckich, daśledčych i inšych arhanizacyj. Ich pradstaŭnikoŭ zatrymlivajuć, pravodziać u ich doma i ŭ ofisach pieratrusy, aryštoŭvajuć rachunki.
Usiaho na siaredzinu vieraśnia, zhodna sa źviestkami pravaabarončaha centra «Viasna», u Biełarusi ad lipienia 2021 hoda ŭžo 135 likvidavanych niedziaržaŭnych arhanizacyj.
Ciapier čytajuć
ŠI-hienieracyju ŭ videahulniach krytykavali, a ciapier zachaplajucca. Źlitaja technałohija ad NVIDIA pieratvaraje staryja hulni ŭ sapraŭdny kiniematohraf44
ŠI-hienieracyju ŭ videahulniach krytykavali, a ciapier zachaplajucca. Źlitaja technałohija ad NVIDIA pieratvaraje staryja hulni ŭ sapraŭdny kiniematohraf4
«Tekst prysiahi prahučaŭ tady dvojčy». Statkievič padzialiŭsia ŭspaminami pra prysiahu biełaruskich vajskoŭcaŭ u 1992 hodzie na Dzień bitvy pad Oršaj99
Kamientary