U Homieli hłuchaniamoha rabočaha asudzili na 2 hady kałonii za abrazu Łukašenki i zakliki da hvałtu
U Homieli asudzili na dva hady na zakrytym pracesie 30-hadovaha Dźmitryja Załomskaha. Jon invalid pa słychu, hłuchaniamy. Jaho ŭziali pad vartu ŭ zale suda i zabrali słychavy aparat, piša «Radyjo Svaboda».
Dźmitryj pracavaŭ naładčykam na pradpryjemstvie «VIPRA» — heta adzinaje pradpryjemstva ŭ Homieli, jakoje daje pracu ludziam z parušeńniem słychu. Ź lutaha ŭ Załomskaha byli pieratrusy, u jaho zabrali kampjutar i telefon. Sud byŭ zakrytym, tamu navat svajaki nie mahli prysutničać na pracesie.
«Dzima čuje vielmi drenna navat z aparatam. Sudu dali stanoŭčyja charaktarystyki i chadajnictvy, kab dali maksimum «chimiju» i jon adpracoŭvaŭ jaje na zavodzie. Viadoma, samaja hałoŭnaja prablema, što jon budzie ŭ kałonii, bo słychavy aparat u jaho zabrali», — kažuć svajaki asudžanaha.
Rodnyja nie viedajuć, što mienavita Dźmitryj pisaŭ u čatach, bo mieć znosiny z čałaviekam, jaki słaba čuje, składana. Miarkujučy pa ŭsim, na chłopca vyjšli, kali pravodzili pieratrusy ŭ rabotnikaŭ pradpryjemstva «VIPRA» — praz toje, što ŭ ludziej z prablemami słychu taksama byŭ svoj nievialiki zakryty čat. Pieratrusy i zatrymańni adbyvalisia ŭ mai.
U prakuratury zajavili, što Dźmitryj «z dapamohaj asabistaha kampjutara i inšych pryład na adnym z telehram-kanałaŭ raźmiaściŭ fotavyjavu kiraŭnika dziaržavy, jakaja źmiaščaje jaho niehatyŭnuju acenku». «U praciah supraćpraŭnych dziejańniaŭ u kastryčniku 2020 hoda apublikavaŭ u telehram-kanale paviedamleńnie z abrazaj pradstaŭnika ŭłady, a ŭ lutym 2021 hoda — paviedamleńnie z zaklikam da hvałtoŭnych dziejańniaŭ u dačynieńni da namieśnika staršyni suda adnaho z rajonaŭ Minska».
Čamu YouTube vydaliŭ kanały BiełTA, STB i ANT? Voś što viadoma11
Kamientary