«Transformiery 2: Pomsta praklatych»: Mašynki dla ludziej
Fantastyčny halivudski bajevik z hadžetami - heta nie film pra žalezki, a kino pra ludziej.
Tranformiery 2: Pomsta praklatych (Transformers: Revenge of the Fallen)
ZŠA, 2009, kalarovy, 150 chv.
Režysior: Majkł Bej
Roli vykonvajuć: Šaja ŁaBief, Miehan Foks, Džoš Dziuamel, Cirez Hibsan, Džon Turtura
Žanr: Fantastyčny bajavik
Adznaka: 6 (z 10)
Złyja robaty-deseptykony atakujuć Ziamlu i marać patušyć sonca. Sem razam sa svajoj dziaŭčynaj Mikaełaj, adstaŭnym ahientam (Džon Turtura) i dobrymi robatami-mašynkami vyratoŭvajuć čałaviectva.
Ad čarhovaha halivudskaha błakbastera na temu chłapiečych hadžetaŭ nie varta čakać fiłasofskich adkryćciaŭ. Ale paśla «Dniaproŭskaha rubiaža» – heta sucelnaja radaść.
Majecca hodny nabor admysłovych efiektaŭ. Robaty-sabaki, robaty-hremliny, robaty-vielikany. Usio vybuchaje, stralaje, lotaje. Ciažkaviki stanoviacca pražerlivymi pačvarami, samaloty pieraŭtvarajucca ŭ insekta-miechaničnych istotaŭ, a lalečnyja aŭtamabili ŭ drobnych škodnikaŭ. Armii ludziej i robataŭ zakidvajuć adzin adnaho harmatami i sychodziacca ŭ rukapašnuju.
Ale samaje važnaje, što ŭsie hetyja miechaničnyja štučki – dziela prostych i zrazumiełych kožnamu rečaŭ.
Padstupnaja dziaŭčyna transfarmujecca ŭ žalezna-jazykastuju ściervu, kab pakazać, što zdradžvać nielha. Aŭtabot Optymus hinie ŭ zmahańni – kab prajavić achviarnaść i čałaviečnaść. Hniusna-padkałodnaja istota, što kiruje deseptykonami – namiakaje na kananičnych «Čužych» i ŭsim svaim vyhladam davodzić, jak kiepska być dyktataram i tyranam. Zvykłyja aŭtamabili demanstrujuć pačućcio humaru, a amierykanskija samaloty padymajucca ŭ pavietra, kab vyratavać prostaha čałaviečka.
I, narešcie, bitva za Ziamlu, miehatony mietału, skavytańnie i vybuchi i navat źniščanaja jehipieckaja piramida – dziela taho, kab chłopiec pryznaŭsia ŭ kachańni dziaŭčynie.
Mienavita z hetych prostych pryčynaŭ halivudskaje kino pra žalezki – heta nie hulni ŭ vajnušku, a kino pra ludziej.
Kamientary