Zasakrečanyja dakumienty Ministerstva abarony Vialikabrytanii, jakija źmiaščajuć padrabiaznuju infarmacyju ab brytanskim eśmincy «Defiender» i brytanskich uzbrojenych siłach, byli znojdzienyja na aŭtobusnym prypynku ŭ anhlijskim hrafstvie Kient, paviedamlaje Bi-bi-si.
U adnym pakiecie dakumientaŭ abmiarkoŭvajecca, u pryvatnaści, vierahodnaja reakcyja Rasii na prachod eśminca praz vody pablizu ŭźbiarežža Kryma ŭ rajonie Sievastopala. Heta miesca Rasija ličyć svaimi terytaryjalnymi vodami, adnak heta nie pryznajecca bolšaściu dziaržaŭ śvietu, u tym liku Vialikabrytanijaj, jany ličać hetyja vody ŭkrainskimi.
Inšaja častka dakumientaŭ źmiaščaje abmierkavańnie płana mahčymaj vajennaj prysutnaści Vialikabrytanii ŭ Afhanistanie paśla zaviaršeńnia tam apieracyi NATA pad kiraŭnictvam ZŠA.
Urad zajaviŭ, što raspačataje rasśledavańnie.
Pa słovach pradstaŭnika Minabarony, adzin z supracoŭnikaŭ viedamstva paviedamiŭ ab prapažy kanfidencyjnych abaronnych dakumientaŭ. Ad dalejšych kamientaroŭ pradstaŭnik Minabarony admoviŭsia.
Pramokły pačak dakumientaŭ, usiaho amal 50 staronak, byŭ znojdzieny za aŭtobusnym prypynkam u Kiencie ranicaj u aŭtorak, heta značyć napiaredadni incydentu ŭ Čornym mory.
Čałaviek, jaki znajšoŭ jaho, pažadaŭ zastacca nieviadomym. Jon źviazaŭsia ź Bi-bi-si, kali ŭśviadomiŭ dalikatny charaktar źmiestu znojdzienych papier.
Bi-bi-si miarkuje, što dakumienty, jakija źmiaščajuć razdrukavanyja elektronnyja listy i prezientacyi PowerPoint, pachodziać z ofisa vysokapastaŭlenaha čynoŭnika Ministerstva abarony.
Dakumienty, jakija adnosiacca da eśminca «Defiender», pakazvajuć, što misija, apisanaja Minabarony jak «mirny prachod praz ukrainskija terytaryjalnyja vody», z začechlenaj karabielnaj artyleryjaj i karabielnym viertalotam u anhary, była praviedzienaja ŭ čakańni, što Rasija moža adkazać ahresiŭna.
U sieradu bolš za 20 rasijskich vajennych samalotaŭ i dva karabli bierahavoj achovy pieraśledvali «Defiender» na adrezku daŭžynioj u 19 km pablizu ŭźbiarežža Kryma.
Jak paviedamiła rasijskaje Ministerstva abarony, pa kursie brytanskaha karabla byŭ adkryty papieradžalny ahoń. Urad Vialikabrytanii asprečyŭ heta, śćviardžajučy, što ahoń adkryty nie byŭ.
Jak vynikaje z vyjaŭlenych dakumientaŭ, u paniadziełak apieracyju z udziełam «Defiendera», jakaja atrymała nazvu «Op Ditroite», abmiarkoŭvali na najvyšejšym uzroŭni. U pryvatnaści, havorka išła ab mahčymaj reakcyi Rasii na źjaŭleńnie karabla la ŭźbiarežža Kryma.
«Što my razumiejem ab mahčymym «vietlivym pryjomie»?» — zadavałasia pytańniem pradstaŭnik pastajannaha sumiesnaha štaba — heta štab troch brytanskich słužbaŭ, jaki płanuje i kantraluje ŭsie vajennyja apieracyi.
U adnoj z prezientacyj, padrychtavanych da narady, adznačałasia, što rasijskija vajskoŭcy mohuć pierajści ad abarončaj taktyki da bolš rašučych dziejańniaŭ.
U štabie razhladali dva mahčymyja maršruty «Defiendera» i try mahčymyja varyjanty dziejańniaŭ u adkaz Rasii — ad «biaśpiečnych i prafiesijnych» da «niebiaśpiečnych i nieprafiesijnych». Vybar spynili na kursie, apisanym jak «biaśpiečny i prafiesijny pramy maršrut z Adesy ŭ Batumi». U dakumientach kazałasia, što taki varyjant dazvoliŭ by prademanstravać, što Brytanija ličyć vody pablizu Kryma ŭkrainskimi.
Pry vybary inšaha kursu ŭdałosia b paźbiehnuć kanfrantacyi z Rasijaj, ale ŭ hetym vypadku mahło skłaścisia ŭražańnie, što Brytanija «spałochałasia i ŭciakła». Heta dazvoliła b Maskvie kazać, što Brytanija de-fakta pryznaje krymskija terytaryjalnyja vody rasijskimi.
U Minabarony Brytanii zajavili, što płanujuć apieracyi akuratna, analizujučy ŭsie mahčymyja ryzyki.
Z vyjaŭlenych u Kiencie dakumientaŭ vynikaje, što rašeńnie nakiravać eśminiec mienavita takim kursam było pryniata brytanskim uradam dla taho, kab vykazać padtrymku Ukrainie, niahledziačy na mahčymyja ryzyki.
Ciapier čytajuć
Andreja Pačobuta pamianiali na łukašenkaŭskich špijonaŭ, aryštavanych u Polščy36
Kamientary