Jašče ŭ krasaviku pradstaŭniki partyi Babaryki «Razam» sprabavali sustrakacca z prychilnikami ŭ rehijonach. Sustreča ŭ Maładziečna pavinna była stać pieršaj u šerahu rehijanalnych znajomstvaŭ anansavanaj partyi ź jaje prychilnikami, ale pravieści mierapryjemstva tady nie dała milicyja.
Ciaham krasavika i traŭnia pradstaŭniki štaba rychtavali jašče šerah rehijanalnych sustreč, ale ŭ bolšaści miescaŭ jany skasoŭvalisia «pa techničnych pryčynach na placoŭkach». Usio zryvałasia za dzień-dva da pryznačanaha času.
«U nas atrymałasia pravieści dźvie sustrečy ŭ Minsku. A paśla stała zrazumieła, što na hety momant sabracca z prychilnikami biaśpiečna prablematyčna. Ahulnaje stanovišča ŭ krainie, na žal, pahoršyłasia ciaham apošnich miesiacaŭ. My pierajšli na anłajn-farmaty. Ciapier u nas prachodziać sustrečy pa abmierkavańni partyjnaj prahramy, rehłamientu pracy arhanizacyi. Takich užo było kala čatyroch. Taksama praciahvajucca sustrečy dla tych, chto tolki padaje zajaŭku na ŭstup u partyju. Ahułam hety ž anłajn-farmat i budzie vykarystoŭvacca bližejšymi miesiacami», — kamientuje ŭdzielnik arhkamiteta Ivan Kraŭcoŭ.
Anton Radniankoŭ, Ivan Kraŭcoŭ, Maksim Znak, Maryja Kaleśnikava, Illa Salej. Fota Paŭła Kryčko.
Na siońnia na sajt partyi «Razam» było padadziena ŭžo 7 tysiač zajavak i byli zapoŭnienyja 3700 ankiet.
«Što ŭ nas jašče adbyvajecca? Z aktualnaha — unutrypartyjnaje ŭtvareńnie, uzhadnieńnie prahramy, pabudova ŭstojlivaj supolnaści prychilnikaŭ. Na ŭsie našyja dziejańni vielmi ŭpłyvaje kantekst krainy, my budziem uličvać jaho u tym liku ŭ častcy praviadzieńnia ŭstanoŭčaha źjezda», — dadaje Ivan Kraŭcoŭ.
«U paniadziełak Viktar Babaryka pavinien skazać u sudzie apošniaje słova. Upeŭnieny, jak zaŭsiody, jano dadatkova natchnić nas i nahadaje pra ahulnuju metu, dziela jakoj my ŭsie ŭžo bolš za hod układajem svaje vysiłki ŭ pieramieny ŭ našaj krainie».
Kamientary