Pravaabaronca Sudalenka dapamoh z drovami šmatdzietnaj viaskovaj siamji. Śledstva nazvała heta «arhanizacyjaj pratestaŭ». Jak tak?
Pryjacielka źniavolenaha pravaabaroncy Leanida Sudalenki atrymała ad jaho list. Jon piša, što jamu pradjavili kančatkovaje abvinavačańnie, i raskazvaje pra svaju «vinu».
Pravaabaronca ŭ homielskim SIZA-3 užo 137 dzion. U liście, datavanym 31 traŭnia, jon paviedamiŭ, što z pačatku červienia pačynaje znajomicca z materyjałami spravy. Kančatkovaje abvinavačańnie jamu pradjavili 28 traŭnia, pa častkach 1 i 2 artykuła 342 Kryminalnaha kodeksu (arhanizacyja i finansavańnie masavych biesparadkaŭ), piša Svaboda.
«Pamiataješ, jak ja ŭzimku dapamoh drovami viaskovaj šmatdzietnaj siamji? Śledztva heta paličyła arhanizacyjaj pratestaŭ. Tamu što potym, u lutym, ich tata byŭ asudžany za ŭdzieł u pratestach», — piša z turmy pravaabaronca.
Sapraŭdy, uzimku Leanid Sudalenka raźmiaściŭ u svaim fejsbuku dopis, dzie prasiŭ nieabyjakavych ludziej dapamahčy viaskoŭcam nabyć drovy, bo inačaj šmatdzietnuju siamju pastavili b u «sacyjalna-niebiaśpiečnaje stanovišča». Paźniej hałavu siamji asudzili nibyta za ŭdzieł u masavych biesparadkach.
«Arhanizacyjaj masavych biesparadkaŭ» śledztva paličyła i dopis pravaabaroncy ŭ fejsbuk z prapanovaj sustreć ź izalatara časovaha ŭtrymańnia žycharku Homla. «Heta značyć, što ja arhanizavaŭ natoŭp i chacieŭ jaho kantralavać», — piša ŭ liście Sudalenka.
Aproč jaho, abvinavačanyja pa hetaj spravie jahonyja pamočnicy Maryja Tarasienka i Taćciana Łasica. Maryja Tarasienka, pavodle infarmacyi ź lista pravaabaroncy, vinavataja ŭ «arhanizacyi biesparadkaŭ», a mienavita ŭ tym, što «niekalki razoŭ pastajała ŭ čarzie ŭ banku pa majoj prośbie».
Pavodle pravaabaroncy, kryminalnaja sprava składaje 50—60 tamoŭ. U abvinavačańni prapisana dapamoha 346 asobam, jakim dapamahaŭ Sudalenka. «Ujavi, kali ich usich zachočuć apytać u sudzie?», — piša ŭ liście pravaabaronca.
Paśla aznajamleńnia sa spravaj jaje pieradaduć u sud. Pravaabaronca miarkuje, što sud pačniecca prykładna ŭ siaredzinie leta.
«Sud, potym pierasud… Da vieraśnia, da majho 55-hadovaha jubileju skonču tut sudovyja spravy i pajedu ŭ lahier na niekalki hadoŭ, vyvučać pahłybleny kurs «turemnaha prava», — piša pravaabaronca.
Jon žartuje, što «ŭ vypadku ŭźniknieńnia fors-mažoru ŭhavorvać mianie viarnucca dadomu nie daviadziecca». «U mianie pačynajecca chałodnaje leta 2021, jak i dla ŭsioj krainy», — dadaje aryštavany.
Jamu nie dazvolili spatkańnia ź siamjoj.
Kamientary