I abyšoŭsia štrafam u 2 miljony rubloŭ.
Heta historyja, padobnaja da siužetu kryminalnaha sieryjała, adbyłasia ŭ Paŭnočnym pasiołku Baranavičaŭ ranicaj 21 červienia.
Inśpiektar darožna‑patrulnaj słužby DAI Baranavickaha haradskoha adździeła ŭnutranych spraŭ Jury Skapiec raskazaŭ, što aŭtamabil «Opiel‑Viektra» zacikaviŭ jaho svaim rucham — aŭtamabil «vichlaŭ» z boku ŭ bok.
Inśpiektar zahadaŭ spynicca. Adnak kiroŭca nie tolki nie prytarmaziŭ, ale naadvarot nacisnuŭ na haz.
Jury Skapiec kinuŭsia na svaim aŭtamabili ŭ pahoniu. Parušalnik lacieŭ na vialikaj chutkaści (pavodle Ju. Skapca, na asobnych učastkach jana siahała 140 km/h). Pryčym ni majački, ni patrabavańnie spynicca pa hukaŭzmacnialniku na parušalnika nie dziejničali.
Naadvarot kiroŭca «Opiela» (u sałonie byli jašče dva jaho siabruki) niby hulaŭsia ź inśpiektaram.
Jon niekalki razoŭ prytarmažvaŭ, čakaŭ, pokul Ju. Skapiec nablizicca da jaho mašyny, -- a potym cisnuŭ na haz.
Pahonia doŭžyłasia pa vulicach horadu niedzie z hadzinu. Urešcie źniasiliŭšysia inśpiektar paprasiŭ kaleh ab dapamozie, pryjšli na dapamohu supracoŭniki miascovaha departamienta achovy.
Na šlachu mašynaŭ nie raz traplalisia piešachody, ravarysty, jakija, pavodle supracoŭnika departamienta achovy Alaksandra Makareviča, pabačyŭšy aŭtamabil miascovaha Mienciuka adskokvali ŭ bok, kab, kryj boža, nie trapić pad koły.
Ad bolšaj kolkaści narodu i mahčymaj trahiedyi vyratavała toje, što była ranica (9 hadzin) vychodnaha dnia.
Na adnym z pavarotaŭ mašynu parušalnika zaniesła i vykinuła ŭ kiuviet. Jury Skapiec pieršy padbieh da mašyny i praz akienca kiroŭcy pasprabavaŭ vyciahnuć kluč zapalvańnia. Alaksandr Makarevič nabližaŭsia z pravaha boku.
U hety momant parušalnik hazanuŭ, i aŭtamabil pačaŭ paskaracca. Juryja Skapca takim čynam praciahnuła niekalki sot mietraŭ.
Ad trahiedyi vyratavali streły pa kołach supracoŭnika departamienta achovy Alaksandra Makareviča. Prajechaŭšy jašče dźvieści mietraŭ, «Opiel» urešcie spyniŭsia.
Parušalnikam akazaŭsia 35‑hadovy žychar Baranavičaŭ, jaki byŭ u stanie ałkaholnaha apjanieńnia. Jaho dva siabruki taksama byli niećviarozyja. Cikava, što kiroŭcu pazbavili ŭ 2007 h. pravoŭ za kiravańnie aŭtamabilem u niećviarozym stanie.
Jašče bolš cikava stała na nastupny dzień. Sud Baranavickaha rajona i horada Baranavičy vynies pastanovu ad pryciahnieńni zatrymanych da administracyjnaj adkaznaści.
Kiroŭcu daviadziecca zapłacić štraf pamieram 2 młn 380 tys. rubloŭ, pasažyram aŭtamabila (za niepadparadkavańnie słužbovaj asoby pry vykanańni im słužbovych paŭnamoctvaŭ) — pa 980 tys. rubloŭ.
Niekatoryja supracoŭniki pravaachoŭčych orhanaŭ paličyli pakarańnie zanadta miakkim.
«Pjany, biez pravoŭ, na chutkaści, ledź čałavieka nie pakalečyŭ, a kolki moh by pakalečyć — i za heta tolki štraf? Miesca takim u turmie», — vykazaŭ svaju dumku supracoŭnik milicyi, jaki nie pažadaŭ nazvać svajo imia.
***
Usiaho z pačatku hodu ŭ Baranavičach zatrymali 512 kiroŭcaŭ u stanie ałkaholnaha apjanieńnia. 35 ź ich ciaham hodu paŭtorna sieli za rul pjanymi.
Kamientary