U historyi zakryćcia kram «Damašni» — novy pavarot. Na minułym tydni byli zatrymanyja žonka i starejšy syn Ivana Bierazoŭskaha. Sam zasnavalnik sietki znachodzicca za miežami Biełarusi. Pra heta Tut.by raspaviali try nie źviazanyja adna z adnoj krynicy.
Pavodle surazmoŭcaŭ, raspačata kryminalnaja sprava pa art. 209 KK (Machlarstva). Zasnavalnikaŭ i top-mieniedžaraŭ sietki padazrajuć u zavałodańni majomaściu šlacham padmanu abo złoŭžyvańnia davieram.
— Pryčyna — daŭhi Bierazoŭskaha pierad bankami, pryvatnymi i dziaržaŭnymi pastaŭščykami, partniorami, rabotnikami. Jaho prosiać pahasić daŭhi i tady abiacajuć vypuścić svajakoŭ. Jon śćviardžaje, što ŭsio adrazu pahasić nie moža, — raspaviadajuć krynicy.
Pavodle infarmacyi Tut.by, žonku i syna Bierazoŭskaha zatrymali na minułym tydni, kali siłaviki naviedvalisia ŭ hałoŭny ofis «NP-servisu», bujnoha dystrybjutara tavaraŭ paŭsiadzionnaha popytu. Hetaja kampanija ličycca padkantrolnaj zasnavalniku sietki mahazinaŭ «Damašni».
Sam Bierazoŭski niedastupny dla kamientaroŭ. Jaho miescaznachodžańnie nieviadoma. Krynicy ŭ suviazi z hetym uspaminajuć vypadak z 2018 hoda. Tady siłaviki padazravali «NP-Servis» va ŭchileńni ad vypłaty padatkaŭ. Bierazoŭski adzin čas byŭ u Łondanie, ale potym viarnuŭsia ŭ Biełaruś i vyrašyŭ pytańni. U Śledčym kamitecie paviedamili, što ŭładalnik «NP-servisu» kampiensavaŭ ustanoŭlenuju škodu pa spravie, tamu jaho nie źmiaščali pad vartu, a ŭziali abaviazacielstva ab jaŭcy.
Ivan i Śviatłana Bierazoŭskija adnahodki — naradzilisia ŭ 1972 hodzie. Pačynali svoj biznes u 90-ch u jakaści IP, handlujučy na rynku ŭ Ždanovičach. Z časam stali bujnymi imparciorami praduktaŭ charčavańnia, a zatym uładalnikami kamiercyjnaj nieruchomaści. Muž i žonka zaŭsiody viali niepubličny ład žyćcia.
Historyja kramaŭ «Damašni» pačałasia z 3 lutaha 2016 hoda, kali byŭ adkryty pieršy supiermarkiet u Minsku. Na piku pośpiechu sietka naličvała bolš za 75 mahazinaŭ u roznych haradach Biełarusi.
U lutym 2021 hoda mnohija kredytory apałčylisia na «Damašni». Pastaŭščyki paviedamlali ab daŭhach na sotni tysiač rubloŭ. U adkaz na heta apieratar staŭ zakryvać stratnyja kramy, rearhanizoŭvać svoj biznes šlacham vydzialeńnia 16 kampanij i vieści pieramovy z novymi inviestarami. U hety ž čas situacyjaj zacikavilisia siłaviki, pastaŭščykoŭ stali vyklikać u DFR.
Ciapier čytajuć
«Ja jedu natchnicca ŭkraincami». Śviatłana Cichanoŭskaja pačała aficyjny vizit va Ukrainu20
Kamientary