Statkievič paviedamiŭ z turmy, u čym sutnaść vysunutaha suprać jaho abvinavačvańnia
Maryna Adamovič atrymała list ad muža Mikałaja Statkieviča za 28 sakavika, u jakim palityk paviedamlaje, što śledstva pa jaho spravie zavieršanaje i jon pačaŭ znajomstva sa 110 tamami spravy.
Voś, što jon piša.
«Sudzić» razam sa mnoj buduć jašče Siarhieja Cichanoŭskaha, Arcioma Sakava, Dźmitryja Papova, Uładzimira Cyhanoviča, Ihara Łosika. Kožnaha z nas abvinavačvajuć pa art. 293 č.1. Akramia taho, va ŭsich «saŭdzielnikaŭ», za vyklučeńniem adnaho mianie, jość jašče dadatkovyja artykuły KK.
Sutnaść «złačynstva» apisana ŭ «abvinavačvańni» nadzvyčaj šmatsłoŭna i zabłytana. Ale koratka jaho možna apisać tak: našy krytyčnyja da ŭłady vykazvańni ŭ internecie vyklikali rost pratesnych nastrojaŭ i pryviali da zbora «niearhanizavanaj masy ludziej», jakija ździejśnili «masavyja biesparadki». Značyć, my — arhanizatary hetych «biesparadkaŭ». Łohika!
U mianie skłałasia ŭražańnie, što navat sami aŭtary hetaha šedeŭra jurysprudencyi jašče nie asensavali zroblenaha imi kałasalnaha praryvu ŭ raźvićci jurydyčnaj praktyki. Tut ža takija pierśpiektyvy adkryvajucca, što až dychańnie ścinaje.
Ciapier ža možna ŭsich, chto apošnija 15 hadoŭ (termin daŭnaści pa asabliva ciažkim złačynstvam?) krytykavaŭ uładu, abvinavacić u «arhanizacyi masavych biesparadkaŭ». Praŭda, na ŭsich takich «złačyncaŭ» miescaŭ u kałonijach nie chopić. Tamu pačali z małoha. Nu, a nam zastajecca tolki hanarycca, što nas abrali pieršymi.
Dumaju, što hety jurydyčny «praryŭ» źviernie ŭvahu ŭsiaho śvietu. Varta čakać delehacyj ź Vieniesueły, Irana, Hankonha i hetak dalej dla pierajmańnia pieradavoha dośviedu. Narešcie Biełaruś apynułasia pieršaj u śviecie. Choć u niečym.
U piatnicu pačaŭ znajomstva sa 110 tamami (!) hetaj «spravy». Kažuć, što heta zojmie miesiac», — pieradaje jon.
Statkievič adznačyŭ, što pačuvajecca dobra.
«Kali łaska, nie chvalujsia za mianie, — prosić jon. — U mianie ŭsio narmalna. Adčuvaju siabie dobra. I ŭpeŭnieny, što ŭsio heta nie praciahniecca zanadta doŭha».
«Miesiacami ŭ kabinie, na siabie zabiŭ. I staŭ pytać: moža, žonka taksama budzie pracavać?». Čamu emihracyja raźbivaje siemji i što rabić, kab usio papravić3434
Kamientary