Siadzieŭ na «Šanchai», byŭ u Navinkach, pierachvareŭ na kavid. Što viadoma pra palitviaźnia z płoščy Pieramien Ściapana Łatypava

Pry zatrymańni Ściapana źbili. Jaho abvinavacili ŭ padrychtoŭcy masavych biesparadkaŭ.

Pry vobšuku ŭ kvatery Ściapana Łatypava, jaki prafesijna zajmajecca lačeńniem drevaŭ, znajšli chimičnyja rečyvy, paśla čaho dziaržaŭnaja prapahanda zajaviła, što jon nibyta z dapamohaj hetych rečyvaŭ rychtavaŭsia trucić milicyjantaŭ.

Siabry Ściapana Łatypava i jahonyja susiedzi z vulicy Čarviakova viaduć ź im pierapisku, a asnoŭnyja źviestki pra jaho vykładvajuć na staronku #viestočkiOtStiepana. Tam ža valantery źmiaščajuć fatazdymki niekatorych jaho listoŭ. Voś što možna daviedacca z hetych dopisaŭ.

«Vaładarka» — špital u Navinkach — znoŭ «Vaładarka»

Paśla zaviadzieńnia kryminalnaj spravy Ściapana Łatypava adpačatku źmiaścili ŭ SIZA-1 na vulicy Vaładarskaha, pryčym u korpus, viadomy drennymi ŭmovami. Pavodle lista, napisanaha ŭ listapadzie, Ściapan pabyvaŭ u hetak zvanym «Šanchai».

«Heta korpus u paŭsutareńni z narami ŭ try pavierchi, poŭny prusakoŭ i marhinałaŭ, tam ja lažaŭ hadzinami, abharnuŭšy tvar mokrym ručnikom. Pieravioŭ mianie adtul lekar, jaki pračytaŭ artykuł pra mianie. Sa słovami «kali ciabie čakajuć takija ludzi, značyć ty hetaha varty». Z drennych navinaŭ — termin utrymańnia pad vartaj praciahnuli da 15.01», — paviedamiŭ tady Łatypaŭ.

U śniežni 2020 hodu siabry Ściapana Łatypava atrymali źviestki, što jon znachodzicca ŭ Navinkach dziela pryznačanaj ekspertyzy. Adtul jaho pieraviali na «Vaładarku». Ściapan heta paćvierdziŭ, kali ŭ lutym adhuknuŭsia na pieravod na jahony rachunak nievialikaj sumy hrošaj.

«Administracyja taksama heta bačyć, i, chaj i ŭ nievialikim pamiery, ale heta farmuje mierkavańnie pra mianie jak pra čałavieka, jakoha lubiać, čakajuć i ceniać», — napisaŭ Ściapan Łatypaŭ čałavieku, jaki vyrašyŭ padtrymać jaho hrašyma.

Pierachvareŭ na karanavirus

U studzieni na «Vaładarcy» Ściapan Łatypaŭ u lohkaj formie pierachvareŭ na karanavirus. Pra heta paviedamili susiedzi Ściapana Łatypava z vulicy Čarviakova.

«Sam fakt hetaha nijak nia dzivić, bo ŭ turmach admysłova stvarajuć umovy, kab ludzi, jakija tudy trapili, zarazilisia», — miarkujuć ludzi, jakija pierapisvajucca z palitviaźniem Łatypavym. «Pažadajem Ściapanu chutčejšaha vyzdaraŭleńnia», — napisali susiedzi Łatypava ŭ siaredzinie studzienia 2021 hodu.

Prablemy ź pierapiskaj nia skončylisia dahetul

U kancy 2020 hodu ŭ palitviaźnia pačalisia prablemy ź pierapiskaj. Voś što paviedamlała krynica #viestočkiOtStiepy pra Łatypava letaś 29 śniežnia:

«Ściapan prosić pieradać, što ŭ jaho ŭsio ŭ paradku, ale biada ź pierapiskaj. Vielmi šmat reža cenzura — i ŭ toj, i ŭ druhi bok. Za apošni tydzień jon adpraviŭ 60 listoŭ i paštovak. Ale, na žal, ź ich dachodzić tolki małaja častka».

U sakaviku adrasat znoŭ napisaŭ, što listavańnie z Łatypavym štučna abmiežavanaje, bo, pavodle jahonych źviestak, turemnaja «cenzura z kavidam na balničnym», ale zaklikaŭ ludziej nie spyniać namahańniaŭ i dalej listavacca z palitviaźniem.

Adrasaty Ściapana Łatypava paviedamlajuć jamu, što ŭ dvary jahonaha doma rehularna prachodziać sustrečy, na jakich zhadvajuć pra jaho, abmieńvajucca navinami ź listavańnia ź im.

U adnym ź listoŭ na volu sam Ściapan hetak napisaŭ pra značeńnie dla jaho hetaj suviazi z susiedziami, jakich jon užo ličyć svajakami: «Mnie dastałasia krynica biaźmiežnaj mocy i ciarpieńnia — vaša luboŭ i padtrymka».

Što da kryminalnaj spravy suprać Ściapana Łatypava, sam jon u listach pra jaje nia zhadvaje, ale susiedzi viedajuć, što jana dahetul nie zavieršanaja. U pierapiscy traplajucca paviedamleńni, što Ściapana Łatypava naviedvaje advakat.

Chto taki Ściapan Łatypaŭ?

U krasaviku Ściapanu Łatypavu spoŭnicca 41 hod. Pavodle prafesii jon arbaryst (dreŭny doktar), a raniej pracavaŭ pramysłovym alpinistam. Dziakujučy redkamu zaniatku Łatypaŭ pabyvaŭ šmat u jakich krainach, pra što zhadvaje ŭ listach na volu. Voś što piša Ściapan u adkaz na atrymanuju paštoŭku ź vidami Kuršskaj kasy:

«Dvojčy byvaŭ na Kuršskaj kasie, časta chadziŭ pa dziunach va Ŭelsie i Hišpanii, u Partuhalii nie adnojčy davodziłasia pracavać na drevach ź vidam na dziuny i akijan. Heta było zdorava, dziakuj tabie».

A jašče ŭ adnym ź listoŭ Ściapana Łatypava jość takaja fraza:

«Upeŭnieny, zaraz mienavita ranica. Nia času dnia, a novaj Biełarusi».

• 0
• 0
• 0
• 0
• 0
• 0
• 0
• 0