17-hadovaha Mikitu Załatarova z Homiela pakarali 5 hadami vychavaŭčaj kałonii za «masavyja biesparadki»
22 lutaha sudździa Dźmitryj Deboj vynies prysud pa kryminalnaj spravie za «masavyja biesparadki». 17-hadovy Mikita Załataroŭ pakarany 5 hadami vychavaŭčaj kałonii, paviedamlaje «Radyjo Svaboda».
26-hadovy Dźmitryj Karniejeŭ pazbaŭleny voli na 8 hadoŭ. 29-hadovy Leanid Kavaloŭ pakarany 6 hadami kałonii.
Prakuror Jaŭhien Fartušniak prasiŭ dla abvinavačanych: Załatarovu — 6 hadoŭ, Kavalovu — 7 hadoŭ, Karniejevu — 8 hadoŭ kałonii.
Usie troje, pa słovach prakurora, adreahavali na zakliki z telehram-kanałaŭ i tamu ŭziali ŭdzieł u «masavych biesparadkach», jakija supravadžalisia «pahromami, padpałami, zbrojnym supracivam pradstaŭnikam ułady».
Mikita Załataroŭ chvareje na epilepsiju. Jahony baćka raskazvaŭ žurnalistam, što Mikitu bili ŭ milicyi i SIZA. Na heta advakat padavaŭ skarhu, ale orhany nie znajšli składu złačynstva.
Advakaty ŭ svaich vystupach zaznačali, što ŭ dziejańniach ich padabaronnych niama składu złačynstva pavodle artykuła 293 Kryminalnaha kodeksa, dzie masavyja biesparadki źviazanyja z «pahromami, padpałami, naŭmysnym źniščeńniem majomaści, uzbrojenym supracivam».
Karniejeva, Kavalova i Załatarova vinavacili ŭ masavych biesparadkach, hvałcie nad milicyjaj, niezakonnych dziejańniach z haručymi rečyvami («kaktejli Mołatava»), a Leanida Kavalova — jašče i va «ŭciahvańni niepaŭnaletniaha ŭ ździajśnieńnie złačynstva».
Pavodle viersii śledstva, Kavaloŭ vyrabiŭ dva kaktejli Mołatava, pieravioz ich u centr horada i schavaŭ u adnym z dvaroŭ. Uviečary 10 žniŭnia jon pryjechaŭ u rajon praviadzieńnia pratesnych mitynhaŭ, dzie znajšoŭ vykanaŭcaŭ svajho płana — 26-hadovaha žychara Dobruša Karniejeva i 16-hadovaha (na toj momant) Załatarova. Mužčyna pieradaŭ novym znajomym kaktejli Mołatava dla taho, kab jany padpalili ścianu jakoha-niebudź doma, a zatym staŭ pierakonvać ich ździejśnić bolš radykalnyja dziejańni — padpalić haradski aŭtobus ci aŭtazak. Pa darozie maładyja ludzi sustreli vajskoŭcaŭ vajskovaj častki 5525 i kinuli kaktejli ŭ ich bok. Plaška ŭpała kala vajskoŭcaŭ i raźbiłasia ab asfalt. Karniejeŭ i Załataroŭ uciakli — ich zatrymali paźniej. A Kavalova ŭ hety ž viečar.
U svaich pakazańniach Kavaloŭ śćviardžaŭ, što plaški byli nie ŭ jaho, a ŭ Karniejeva i Załatarova. Dźmitryj Karniejeŭ ža pierakonvaŭ sud, što jaho i Załatarova prymušaŭ padpalvać i kidać plaški Kavaloŭ. Załataroŭ spačatku admaŭlaŭsia ad dačy pakazańniaŭ, a zatym raspavioŭ, što mienavita Karniejeŭ prymušaŭ jaho kinuć butelku.
Stali viadomyja padrabiaznaści taho, jak u Vjetnamie zatrymali Vieramiejčyka21
Kamientary