«Budziem stralać na paražeńnie». Jak zatrymlivali łyžnikaŭ pad Maładziečnam i sudzili ŭ aktavaj zale RAUS

Dniom u niadzielu, 14 lutaha, Palina razam sa znajomymi pryjechała da vioski Lešna ŭ Maładziečanskim rajonie. Tam ludzi pačali raspakoŭvajuć invientar, nadziavać łyžy. Paśla spuścilisia na łyžach z horki. Palina pamiataje, što zatym niechta šapnuŭ, što zzadu idzie AMAP, ale heta byli milicyjaniery.

— Pačuła, što kryčać «Stajać! Budziem stralać na paražeńnie». Ja spyniłasia. Mužčyna sa ściaham pabieh, ale jaho spynili i byccam pačali jaho źbivać. Da milicyjanieraŭ padyšła dziaŭčyna, pačała razmaŭlać, a jany schapili za kurtku i krychu jaje parvali.

U ludziej zabrali telefony, dastali atrybutyku. Paśla čakali žančyn ź milicyi, kab tyja praviali ahlad zatrymanych dziaŭčyn. Supracoŭniki skazali, što ich vyklikaŭ vartaŭnik, bo bajaŭsia za svajo žyćcio.

Palina paćviardžaje, što razam ź ludźmi byŭ niećviarozy mužčyna. Pa jaje słovach, ahresiŭna siabie nie vioŭ.

— Ja bačyła, što jaho šturchnuli ŭ śpinu. Jon upaŭ. Samy hałoŭny z supracoŭnikaŭ, tak razumieju, kryknuŭ, kab na jaho nadzieli kajdanki. Dumaju, što heta była pravakacyja, kab tolki tyja kajdanki nadzieć.

Paśla zatrymanych pavieźli ŭ adździeł milicyi. Tam ich zaviali ŭ cir, dzie ludzi prastajali tvarami da ściany čatyry hadziny. Milicyjaniery dazvalali pić čaj i kavu z termasaŭ. U hety cir zachodziŭ načalnik Maładziečanskaha RAUS Vadzim Pryhara.

— Jon zachodziŭ, hladzieŭ. Z nami nie razmaŭlaŭ, tolki ź milicyjanierami. Rabiŭ jašče zaŭvahi, kab my maŭčali i stajali tvarami da ściany.

Da žančyn pryjšoŭ inśpiektar pa spravach niepaŭnaletnich. Jon vyśviatlaŭ, z kim znachodziacca dzieci zatrymanych. Adnu žančynu ŭ toj dzień adpuścili, bo jaje dzicia zastałosia adno.

Paśla kožnaha apytvali: navošta pryjechali, chto arhanizatar. Palina kaža, što nichto z supracoŭnikaŭ nie patłumačyŭ, za što jany zatrymanyja. Paśla apytańnia Palinu i jašče adnu žančynu adviali ŭ tak zvany «stakan», dzie jany prabyli čatyry hadziny. A bližej da apoŭnačy adviali ŭ izalatar časovaha ŭtrymańnia.

— Ščyra kažučy, u izalatary było ŭsio dobra. Milicyjanier tam skazaŭ, kab my paśla napisali ŭ maładziečanski čat, što jany tut nie karniki. Kazaŭ, što jany nie fašysty, nie viedajuć niamieckuju, a pa-rusku i pa-biełarusku razumiejuć.

U izalatary Palina siadzieła ź dźviuma žančynami, jakich taksama zatrymali la Lešna. Im abiacali, što sud adbudziecca ŭ paniadziełak. Adnak Palinu sudzili ŭ aŭtorak.

Sud prachodziŭ u aktavaj zale RAUS. Palinu sudziŭ sudździa Alaksiej Iršyn. Joj pakazali videa z zatrymańnia, śviedčyli dvoje supracoŭnikaŭ milicyi.

— Iršyn zapytaŭsia, jakoje pakarańnie ja chacieła b. Kaniešnie, skazała, što štraf, a nie sutki. Heta moj pieršy štraf pa artykule 23.34, raniej nikoli nie było.

Što adbyłosia

14 lutaha kala vioski Lešna zatrymali 19 łyžnikaŭ. Pres-słužba MUS paviedamlała, što supracoŭniki Maładziečanskaha RAUS vyjechali pa vykliku vartaŭnika padstancyi elektrasietak. Tam, jak śćviardžaje pres-słužba MUS, prachodziła niesankcyjanavanaje masavaje mierapryjemstva.

• 0
• 0
• 0
• 0
• 0
• 0
• 0
• 0