Na 22 čałavieki 10 supracoŭnikaŭ milicyi. Jak prachodziać ciapier ekskursii ŭ Połacku
Štoniadzielu ŭ Połacku adbyvajucca ekskursii dla žycharoŭ i haściej horada. Adnak ciapier ekskursantaŭ supravadžaje hrupa supracoŭnikaŭ MUS. I nie tolki supravadžaje — zdymaje ŭdzielnikaŭ ekskursii na videakamiery dy pierapisvaje ich asabistyja danyja, paviedamlajuć pravaabaroncy.
Prajekt niadzielnych ekskursij ładziać ekskursavody Połacka. Na ich dumku, u toj čas, kali turystaŭ niašmat, treba adkryvać tajamnicy Połackaj ziamli ŭsim, chto cikavicca. I całkam biaspłatna.
Prajekt ź pieršaha dnia pryciahnuŭ uvahu milicyi. Kožny raz, kali pravodziłasia ekskursija, za hrupaj išła para milicyjanieraŭ u poŭnaj ekipiroŭcy. Jany byli pobač z udzielnikami i ŭ staravierskaj carkvie, i ŭ kaściole, i ŭ muziei «Epocha Lenina». Ale toje, što ekskursanty pabačyli 7 lutaha, padšturchnuła ich napisać skarhu ŭ prakuraturu Połackaha rajona.
U hety dzień hrupa ekskursantaŭ sabrałasia na płoščy Francyska Skaryny. Padčas ahladnaj ekskursii pa horadzie havorka išła pra navučalnyja ŭstanovy ŭ Połacku na pačatku XX stahodździa.
«Ale kolkaść milicyjanieraŭ u formie i biez formy, jakija atačali našuju hrupu, uraziła. Na 22 ekskursanty my naličyli 10 supracoŭnikaŭ orhanaŭ unutranych spraŭ, jakija «kanvajavali» nas da samaha muzieja», — raskazała pałačanka Łarysa.
Pavodle žančyny, kali hrupa vychodziła z muzieja, milicyjaniery pačali zdymać usich ekskursantaŭ na niekalki videakamier, a major Cimur Łaŭrenćjeŭ pravieryŭ (a potym i sfatahrafavaŭ) u ekskursavoda dakumienty i śpis ekskursantaŭ.
Udzielniki niadzielnych ekskursij čakajuć ciapier, što adkaža na ich zvarot prakuratura.
Kamientary