«Zahad na adličeńnie studentaŭ supiarečyć zakanadaŭstvu». Z BrDTU zvolniłasia načalnica juradździeła
Tydzień tamu zvolniłasia juryskonsult Bresckaha dziaržaŭnaha techničnaha ŭniviersiteta — žančyna nie zachacieła padpisvać zahad ab adličeńni studentaŭ, bo jon supiarečyŭ zakanadaŭstvu.
A ciapier z pracy syšła i jaje načalnica Taćciana Kryvuščanka, jakaja ŭznačalvała jurydyčny adździeł BrDTU.
«Ja była ŭ adpačynku, mianie zamianiała juryskonsult, jakaja nie zachacieła padpisvać zahad ab adličeńni studentaŭ. Jana kansultavałasia sa mnoju, ja paćvierdziła — zahad supiarečyć zakanadaŭstvu.
Kali ja vyjšła z adpačynku, adrazu ŭ paniadziełak ranicaj mianie vyklikaŭ rektar Alaksandr Bachanovič. Skazaŭ toje ž, što i juryskonsultu: my z vami nie spracujemsia. Razmova była kala 30 chvilin, prysutničaŭ «kamitetčyk». Heta mužčyna, jaki ciapier budzie prarektaram ci to pa kadrach, ci to pa biaśpiecy. Jon prysutničaje ciapier pry ŭsich razmovach rektara, — raspaviała «Našaj Nivie» Taćciana Kryvuščanka.
— Rektar abvinavaciŭ mianie ŭ pieravyšeńni paŭnamoctvaŭ, bo ja paćvierdziła, što jaho zahad na adličeńnie studentaŭ byŭ nielehitymny. I paprakaŭ mianie, što ja kansultavała studentaŭ. Heta praŭda, ja razmaŭlała z adnym sa studentaŭ, jakoha adličyli.
Ja doŭha tłumačyła, čamu zahad byŭ niapravilny, što heta maja praca i maja pramaja funkcyja — praviarać dakumienty VNU, kab u ich nie było pamyłak. Rektar pahražaŭ: zvalniajsia pa-dobramu ci budzie horš. Ja paśmiajałasia, spačatku skazała, što zajavu pisać nie budu. Kažu: zvalniajcie pa artykule, kali zmožacie znajści artykuł.
Paśla ja napisała dakładnuju zapisku, dzie raspaviała ŭsie abstaviny, zarehistravała jaje. Papieru pieradali rektaru — i na nastupny dzień ja napisała zajavu na zvalnieńnie pa zhodzie bakoŭ».
Kryvuščanka pracavała ŭ BrDTU 15 hadoŭ.
«Pakul nie viedaju, što rabić dalej — kredyty, rasterminoŭki, jak va ŭsich. Pracu ŭ Breście znajści niaprosta, tamu budu ŭdziačnaja prapanovam.
Ale ja nie škaduju ni ŭ jakim razie pra svoj učynak. Lepš siadzieć biez pracy, čym rabić toje, što ad mianie patrabavali», — kaža Taćciana.
Ciapier čytajuć
Daišnik, jakoha źbiŭ mašynaj piensijanier pad Minskam, pamior u balnicy. Jamu zładzili pyšnaje pachavańnie18
Kamientary