U Žłobinie vystup Kaleśnikavaj sprabavaŭ sarvać vajskovy kamisar Homielskaj vobłaści
Bolš za 1000 čałaviek prysutničali na sustrečy ŭ Žłobinie z čalcom Kaardynacyjnaj rady dla pieradačy ŭłady Maryjaj Kaleśnikavaj, paviedamlaje Svaboda.
Aproč prychilnikaŭ pieramienaŭ ź bieł-čyrvona-biełymi ściahami, na sustreču pryjšli i ludzi z aficyjnymi čyrvona-zialonymi ściahami.
Kaleśnikava zajaviła, što pryjechała padtrymać rabočych Biełaruskaha metalurhičnaha zavodu, dzie ŭžo častkova pierapyniali vytvorčaść na znak pratestu suprać falsyfikacyi vybaraŭ i hvałtu siłavikoŭ.
«Ja vami hanarusia. Jany sprabujuć nas zapałochvać, ale nas šmat, vy — nievierahodnyja», — skazała Kaleśnikava.
Vystupać joj pieraškadžaŭ vajskovy kamisar Homielskaj vobłaści padpałkoŭnik Andrej Kryvanosaŭ z mehafonam, jaki «pradstaŭlaŭ» pazycyju ŭład. Urešcie apanenty damovilisia vystupać pa čarzie.
Vajenkam davodziŭ, što zavody pavinny pracavać, inakš nia budzie hrošaj u biudžecie. «Davajcie pasłuchajem mianie! Tolki što skazali, što narod Biełarusi zapałochvajuć, padymicie ruki, kamu pahražali zvalnieńniem», — kaža jon.
Ludzi sustreli jaho pytańnie krykami «Vierym! Možam! Pieramožam!» i «Sychodź!».
Kali Maryja Kaleśnikava zaviaršyła vystup i nakiravałasia da parkoŭki z aŭtamabilem, śledam za joj pajšła kalona prychilnikaŭ Alaksandra Łukašenki, jakaja vyhukvała «Źjaždžaj!» i «Biełaruś nie addadzim!».
Ciapier čytajuć
«Łukašenka prosta nie viedaje». Jabaćku, jaki vykładaŭ u tyktok videa pra bulinh dački, pasadzili na paŭtara miesiaca9
Kamientary