Spyniŭ la mohiłak supracoŭnik DAI, i adrazu da «Tesły» padbiehli niekalki čałaviek: jak zatrymlivali Viktara Babaryku

Advakat Alaksandr Pylčanka raspavioŭ pra heta «Narodnaj Voli»:

— Ranicaj 18 červienia, kala 9 hadzin ranicy, Viktar Babaryka vyjazdžaŭ u horad. Vioz z saboj padpisnyja listy dla ich padačy ŭ kamisiju. Niedaloka ad vioski Mačany, dzie jon pražyvaje, na pustoj prasiołkavaj darozie kala mohiłak jaho spyniŭ supracoŭnik DAI. Pakul jon davaŭ jamu dakumienty, da mašyny padbiehli niekalki čałaviek. Viktar Dźmitryjevič paprasiŭ pradstavicca, jamu niešta tycnuli pad nos, ale jon ničoha nie paśpieŭ pračytać. Babaryku vyvieli z-za rula aŭtamabila, pasadzili na zadniaje siadzieńnie jaho «Tesły». Viktar Dźmitryjevič skazaŭ, što, kali da jaho jość pytańni, jon hatovy pa pieršym patrabavańni orhana rasśledavańnia prybyć u nazvanyja miesca i čas.

Na heta jamu adkazali: daviaziom. Babaryka zajaviŭ, što rasceńvaje heta jak vykradańnie, i zapatrabavaŭ zaprasić jaho advakataŭ. Usie pahruzilisia ŭ «Tesłu», adzin ź nieviadomych nam hierojaŭ sieŭ za rul, i pajechali ŭ napramku Minska.

Pahadziciesia, situacyja vielmi stresavaja. Jak kazaŭ Viktar Dźmitryjevič, na praciahu tydnia abo bolš jamu pastajanna kazali: maŭlaŭ, uciakaj, ciabie aryštujuć. Dyk niama za što, ździŭlaŭsia jon, i nichto mianie nie zaprašaje nikudy …

Jaho pryvieźli ŭ DFR. Asabistyja rečy — płanšet, dva telefony, hadzińnik — kinuli ŭ mašynu na zadniaje siadzieńnie, a jaho paviali ŭ budynak. Los hetaj majomaści, a taksama aŭtamabila, jaki znachodzicca ŭ lizinhu, jamu da hetaha času nie viadomy. Sa słoŭ Viktara Dźmitryjeviča, u pratakole asabistaha pieratrusu nazvanych rečaŭ i aŭtamabila niama.

Ź pieršych chvilin Babaryka patrabavaŭ zaprasić jaho advakataŭ, pakolki jon zatrymany. Darečy, my, advakaty, u hety čas sprabavali trapić u budynak, kab paviedamić ab pryniaćci abarony Babaryki. Uvachod u budynak byŭ začynieny. U hetym budynku, darečy, znachodzicca nie tolki DFR, i inšyja asoby śpiarša tudy prachodzili. Uvachod byŭ začynieny vyklučna dla nas. Dakumienty ad nas pryniać admovilisia, jak i skarhu na advolnaje nieabhruntavanaje zatrymańnie. Tolki ranicaj nastupnaha dnia nas zaprasili na dopyt u KDB.

Pylčanka taksama raspavioŭ pra ŭmovy ŭtrymańnia Viktara Babaryki ŭ «amierykancy».

- Da piersanału pretenzij niama. Umovy ŭtrymańnia - jak u mnohich. Jość prablemy pobytu. Z-za niadopusku nas da Viktara Dźmitryjeviču 18 červienia jon nie zmoh paviedamić, jakija pieradać jamu asabistyja rečy. Režym pryjomu pieradač: paniadziełak, sierada, piatnica. Tak što ŭvieś hety čas jon byŭ u ofisnaj adziežy. Spalnaje miesca ŭ jaho — dadatkovaje. Tak zvany «viertalot» - stavicca pamiž inšymi łožkami na noč. Heta značyć, što dniom u kamiery prytknucca niama kudy.