Imidž Ukrainy moža paciarpieć u vypadku, kali novaja ŭłada ŭ asobie prezidenta Uładzimira Zialenskaha budzie palityčna pieraśledvać byłoha kiraŭnika dziaržavy Piatra Parašenku. Takim mierkavańniem padzialiŭsia eks-prezident Polščy Alaksandr Kvaśnieŭski ŭ intervju «Bi-bi-si Ukraina».
Palityk adznačyŭ, što vinavatyja, niezaležna ad svajho statusu, sapraŭdy pavinny adkazvać pierad zakonam, adnak heta pavinna adbyvacca «niezaležna i prazrysta».
«Nie moža być palityčnych rašeńniaŭ. (…) Heta drenna. Kali Parašenka niešta zrabiŭ niekarektnaje, sudy hetym pytańniem pavinny zajmacca — jany, biez prezidenta, biez palityčnaha faktaru», — adznačyŭ jon.
Surazmoŭca vydańnia padkreśliŭ, što Zialenski, takim čynam, varta ŭstrymacca ad revanšyzmu. Kali ŭkrainski prezident «budzie rabić, što choča, bo heta revanš», heta admoŭna adabjecca, pierš za ŭsio, na im samim i na jaho imidžy «maładoha čałavieka, jaki hladzić u budučyniu (…) i choča stvarać sučasnuju demakratyčnuju krainu».
Kvaśnieŭski vykazaŭ zdahadku, što suśvietnaja supolnaść abaviazkova adreahuje na pačatak takoha «palityčnaha śpiektakla», bo, pa jaho słovach, Parašenka byŭ pavažanym partnioram mnohich jeŭrapiejskich lidaraŭ, jakija «nie buduć prosta siadzieć i hladzieć» na padziei.
Ciapier čytajuć
«Uźnikajuć ujaŭleńni, što palitviaźni musiać być stojkimi, sabranymi, udziačnymi. A realnaść roznaja». Pahavaryli ź ludźmi, jakija vodziać departavanych litaralna za ruku55
Kamientary