Ptuški — pieramožcy «narodnaha hałasavańnia» nie raz rabilisia ptuškami hoda. A heta značyć, što mienavita tvoj hołas moža być vyrašalnym!
Hramadskaja arhanizacyja «Achova ptušak Baćkaŭščyny» (APB) abviaščaje niezvyčajnaje anłajn-hałasavańnie — za ptušku, jakaja budzie «narodnym kandydatam» na zvańnie kryłataha simvała nastupnaha hoda.
Prahałasavać možna pa spasyłcy ptushki.org/birdoftheyear da 7 lutaha ŭklučna.
U kandydaty-2020 užo vyłučyli hłušca, šeruju kurapatku, šeruju vałasianicu i strynatku-čarotaŭku. Taksama možna dadać inšy vid, jaki raniej nie byŭ ptuškaj hoda. Pažadana, kab jon adpaviadaŭ peŭnym kryteram.
Raniej ptuškami hoda byli: bieły busieł, biełaja pliska, avialha, damavy vierabiej, haradskaja łastaŭka, baradataja kuhakaŭka, knihaŭka, zvyčajny sałaviej, vialikaja biełaja čapla, šeraja huś, sokał-pustalha, vialiki kulon, čorny śvirhul, udod, zvyčajnaja ziaziula, vušataja sava, žaŭruk-śmiaciuch, ščyhieł, vialiki arlec.
Karyna Sałaviej, kiraŭnik adździeła raźvićcia APB, raspaviała:»Kandydataŭ na ptušku hoda zaŭsiody try, ale akurat pieramožcy «narodnaha hałasavańnia» nie raz rabilisia ptuškami hoda. A heta značyć, što mienavita tvoj hołas moža być vyrašalnym! Raskažy siabram pra takuju mahčymaść — kožny z nas moža arhanizavać sapraŭdnuju pieradvybarčuju kampaniju dla ŭlubionaha vidu!»
Ptušku hoda abiaruć siabry APB na štohadovym źjeździe, jaki adbudziecca 9 lutaha ŭ Minsku. Akramia ptuški-naminanta, jakaja pieramoža ŭ anłajn-hałasavańni, dźviuch ptušak-kandydataŭ prapanujuć Centralny saviet i Sakrataryjat arhanizacyi.
Nacyjanalnuju kampaniju «Ptuška hoda» APB pravodzić z 2000 hoda. Hałoŭnaja meta kampanii — pryciahnuć uvahu biełarusaŭ da charastva pryrody i ptušak, što žyvuć vakoł nas, da nieabchodnaści ich zachavańnia.
Kamientary