Ułady adkazali na zvarot pra pieranos vychodnaha z 7 na 2 listapada: Historyja paćviardžaje značnaść ideałaŭ Kastryčnickaj revalucyi
Zamiest 7 listapada prapanoŭvałasia zrabić vychodnym dniom 2 listapada, Dzień pamiaci, abo Dziady, jaki ŭmacuje siamiejnyja kaštoŭnaści praz naviedvańnie členami siamji mohiłak prodkaŭ.
Haradzienski haradski kaardynatar Biełaruskaj chryścijanskaj demakratyi Jaŭhien Dudkin atrymaŭ ź ministerstva pracy i sacyjalnaj abarony nasielnictva adkaz na kalektyŭny zvarot z prośbaj pieranieści vychodny dzień z 7 listapada, dnia Kastryčnickaj revalucyi, na 2 listapada, Dziady. Abodva dni ŭ Biełarusi źjaŭlajucca śviatočnymi, adnak Dziady nie źjaŭlajucca vychodnym.
Jak piša sajt BCHD, u zvarocie nahadvałasia, što Kanstytucyja Biełarusi zabaraniaje ŭstalavańnie ideałohii palityčnych partyj u jakaści abaviazkovaj dla hramadzian, tady jak 7 listapada ŭšanoŭvajecca mienavita historyja Kamunistyčnaj Partyi Savieckaha Sajuza, jakaja ŭstalavała adnapartyjnuju sistemu ŭ Biełarusi, rujnavała chramy, arhanizavała hanieńni na vierujučych i masavyja represii suprać intelihiencyi, sialan i pracoŭnych.
Zamiest 7 listapada prapanoŭvałasia zrabić vychodnym dniom 2 listapada, Dzień pamiaci, abo Dziady, jaki ŭmacuje siamiejnyja kaštoŭnaści praz naviedvańnie členami siamji mohiłak prodkaŭ, a ŭ ramkach abvieščanaha 2018 hoda Hodam małoj radzimy ŭzmacnić mahčymaści hramadzian ŭ naviadzieńni paradku ŭ małych nasielenych punktach.
Ale ŭ adkazie ź Minpracy za podpisam pieršaha namieśnika ministra Andreja Łaboviča havorycca, što «prapanova pra pieranos vychadnoha dnia z 7 listapada na 2 listapada ŭ ciapierašni čas nie razhladajecca». Pavodle jaho, u Biełarusi i tak jość try vychodnyja relihijnyja śviaty (Rastvo 7 studzienia i 25 śniežnia, Radaŭnica), a abviaščeńnie «jašče adnaho niepracoŭnaha śviatočnaha dnia (relihijnaha śviata) dla viernikaŭ peŭnaj kanfiesii moža vyklikać niezadavolenaść viernikaŭ inšych kanfiesij».
Bolš za toje, zajaŭlaje ministr, «data 7 listapada — Dzień Kastryčnickaj revalucyi, stała adnoj z samych značnych padziej XX stahodździa i karennym čynam paŭpłyvała na chod dalejšaj historyi».
«Historyja paćviardžaje značnaść ideałaŭ Vialikaj Kastryčnickaj Sacyjalistyčnaj Revalucyi — vyzvaleńnie pracoŭnych ad ekspłuatacyi i pryhniotu, zaćviardžeńnie raŭnapraŭja i sacyjalnaj spraviadlivaści. Dadzienyja pryncypy zakładzieny ŭ Kanstytucyi Respubliki Biełaruś. A dla kahości heta prosta jašče adzin vychadny, na praciahu jakoha možna prosta adpačyć abo pravieści čas ź siamjoj», — zajaŭlaje Andrej Łabovič.
Ciapier čytajuć
Dźmitryj Siemčanka: Ja pryjšoŭ u puł Łukašenki bicca z Rasijaj16
Kamientary