Ad 31 žniŭnia pasada ministra enierhietyki pierastała być vakantnaj. Novym kiraŭnikom staŭ Viktar Karankievič, stały supracoŭnik ministerstva.
Nahadajem, što zatrymańnie (jakoje tak i nie paćvierdzili siłaviki) byłoha ministra Uładzimira Patupčyka adbyłosia bolš za 3 miesiacy tamu.
Enierhietyčnaja siamja
Karankievič — čarhovy adnosna małady čynoŭnik. Jamu 42 hady.
Jon naradziŭsia ŭ Kiraŭsku (Mahiloŭskaja vobłaść). Maci vykładała muzyku ŭ dziciačym sadku i škole, baćka Michaił byŭ enierhietykam. Pracavaŭ inžynieram, načalnikam rajonnaj dyśpietčarskaj słužby.
U Michaiła Karankieviča dvoje synoŭ: Anton i Viktar. Abodva jašče ź dziacinstva vyrašyli iści pa baćkavych śladach.
«Jašče ŭ škole prychodzili da taty na pracu, vielmi padabałasia, było cikava. Ja navat u sačynieńniach pisaŭ, što budu enierhietykam», — raspavioŭ «Našaj Nivie» Anton Karankievič.
Jaho mara ździejśniłasia — Anton staŭ namieśnikam dyrektara ŭ Babrujskich elektrasietkach. A jaho brat Viktar, jak vidać, dasłužyŭsia da ministra.
Baćki Karankievičaŭ siońnia na piensii, praciahvajuć žyć u Kiraŭsku.
Cikava, što Karankievič — vielmi raspaŭsiudžanaje proźvišča ŭ Kiraŭsku. Miascovyja kažuć, što rod išoŭ ź vioski Chamičy, jakaja była pobač. Tam, maŭlaŭ, amal usich zvali Karankievičami, niezaležna ad svajactva.
«Heta praŭda. Naša siamja taksama viadzie rod z tych Chamičoŭ, — paćvierdziŭ Anton Karankievič. — Maje babula ź dziadulem svajakami nie byli, viadoma ž. Ale i ŭ dziaduli proźvišča Karankievič, i babulina dziavočaje — Karankievič. U maci z baćkam toje samaje — aboje Karankievičy».
Vučyŭsia ŭ pryvatnaj VNU
U 1997 hodzie Viktar Karankievič skončyŭ niedziaržaŭny Instytut sučasnych viedaŭ. Paźniej, praŭda, praciahnuŭ vučobu. U 2005 hodzie jon skončyŭ Biełaruski nacyjanalny techničny ŭniviersitet. A paśla jašče daviałosia advučycca ŭ Akademii kiravańnia.
Usio žyćcio ŭ enierhietycy
Pracavać Viktar pačaŭ z 1997 hoda. Halina pracy, naturalna, enierhietyka. Z 1997 pa 2004 hod Karankievič zajmaŭ pasady śpiecyjalista i viadučaha śpiecyjalista ŭ roznych strukturach Biełaruskaha dziaržaŭnaha enierhietyčnaha kancerna.
U 2004—2006 hadach byŭ načalnikam finansavaha adździeła, namieśnikam načalnika ŭpraŭleńnia finansaŭ, uliku i spravazdačnaści Biełaruskaha dziaržaŭnaha enierhietyčnaha kancerna (ciapier — «Biełenierha»)
Z 2006 pa 2012 hod zajmaŭ pasadu načalnika hałoŭnaha ekanamičnaha ŭpraŭleńnia Ministerstva enierhietyki Biełarusi. U 2012 hodzie pryznačany namieśnikam ministra enierhietyki, u 2017 hodzie — pieršym namieśnikam ministra.
Užo nie žanaty
Siońnia Viktar Karankievič nie žanaty. Peŭny čas tamu jon raźvioŭsia. Ale maje darosłaje dzicia — synu Viktara 22 hady.
Chobi ŭ novaha ministra typovyja mužčynskija: rybałka i sport. Svajaki kažuć, jon vialiki amatar futboła.
Abiacaŭ nie mianiać taryfy
Viktar Karankievič — piersona nie publičnaja. Zvyčajna jon źjaŭlaŭsia ŭ navinach padčas adkryćcia enierhietyčnych abjektaŭ ci vystupajučy z prahramnymi zajavami. Tak, naprykład, u kancy 2017 hoda Karankievič abiacaŭ, što taryfy na elektryčnuju enierhiju pierahladacca nie buduć. Maŭlaŭ, biełaruskaja dyfierencyjavanaja sistema dastatkova paśpiachovaja.
Ciapier čytajuć
U Minsku pradajuć dom na vadzie. Kolki prosiać za niezvyčajny abjekt na Čyžoŭskim vadaschoviščy?3
Kamientary