ZŠA departavali ŭ Niamieččynu 95-hadovaha Jakava Palija, jaki słužyŭ achoŭnikam u kancłahiery «Traŭniki» ŭ Polščy, dzie zahinuli kala 6 tysiač jaŭrejaŭ, paviedamlaje Associated Press. Palij — apošni viadomy mierkavany złačyniec Treciaha rejcha, jaki pražyvaŭ na terytoryi Amieryki. Jon pryjechaŭ tudy ŭ 1949 hodzie, schłusiŭšy pra svajo minułaje. Tady emihrant zajaviŭ, što padčas vajny byŭ prostym rabočym. Praz 8 hadoŭ Jakaŭ atrymaŭ amierykanskaje hramadzianstva, pracavaŭ u Štatach usio žyćcio i zatym vyjšaŭ na piensiju.
Tryccać hadoŭ tamu palicyja znajšła jaho imia ŭ rejestry nacysckich złačyncaŭ. U hutarcy sa śledstvam u 1993 hodzie Palij pryznaŭsia, što nikoli b nie atrymaŭ amierykanskuju vizu, kali b raskazaŭ praŭdu.
U 2003 hodzie sud pazbaviŭ Palija amierykanskaha hramadzianstva. Adnak pry sprobie departavać jaho vyśvietliłasia, što ni adna kraina — ni Ukraina, ni Polšča, ni Hiermanija — nie žadaje jaho prymać.
Paśla pieramoŭ ź Bierlinam departacyja ŭsio ž adbyłasia, niahledziačy na toje, što farmalna Jakaŭ zastajecca asobaj biez hramadzianstva. Pavodle haziety Bild, Hiermanija raźmiaściła jaho ŭ domie sastarełych.
Kamientary