PKB zaniałosia samakrytykaj

«Vybary, što prajšli, vyjavili šerah słabych miescaŭ u arhanizacyi partyjnaj pracy, što vyklikaje abhruntavanuju tryvohu ŭ śviatle važnych palityčnych kampanij najbližejšaha budučaha», — pra heta, pavodle źviestak pres‑słužby Partyi kamunistaŭ Biełaruskaj, havorycca ŭ pastanovie Ch plenuma CK PKB, što prajšoŭ u Minsku 19 kastryčnika.

Partyja «nie skarystała najaŭnyja mahčymaści pa vyłučeńni i rehistracyi bolšaj kolkaści svaich kandydataŭ u deputaty, šerah partarhanizacyj akazali im słabuju padtrymku ŭ pieryjad zboru podpisaŭ hramadzian i praviadzieńnia pieradvybarnaj ahitacyi». Členy PKB, uklučanyja ŭ skład akruhovych i ŭčastkovych vybarčych kamisij, «nie zdoleli (za redkim vyklučeńniem) vykarystać dadzienyja paŭnamoctvy dla praviadzieńnia vybaraŭ u strohaj adpaviednaści z zakanadaŭstvam i zboru pierakanaŭčych dokazaŭ niedemakratyčnaści prajšoŭšaj vybarčaj kampanii». «Hetkaj ža acenki» zasłuhoŭvaje i praca «mnohich naziralnikaŭ, delehavanych partyjaj na vybarčyja ŭčastki».

Razam z tym, jak zaznačajecca ŭ pastanovie, «rašeńnie partyi ab poŭnamaštabnym udziele ŭ vybarčaj kampanii było pravilnym». PKB «zdoleła vykarystać mahčymaści, što pradastaŭlajucca Vybarčym kodeksam Respubliki Biełaruś, dla aktyŭnaj pracy z nasielnictvam, daviadzieńnia da ludziej svaich prahramnych metaŭ i zadač, prapanoŭ ab\jadnanych demakratyčnych sił pa źmianieńni situacyi ŭ krainie, krytyčnaha analizu isnujučaha stanovišča spraŭ».

Partyja «zabiaśpiečyła vyłučeńnie i rehistracyju svaich kandydataŭ u 14 vybarčych akruhach, a taksama akazała padtrymku demakratyčnym kandydatam u inšych rehijonach». Bolšaść kandydataŭ‑kamunistaŭ «zdoleli zhurtavać vakoł siabie dziejazdolnyja kamandy i praviali ŭ svaich akruhach jakasnyja vybarčyja kampanii, atrymaŭšy značnuju padtrymku vybarščykaŭ». «Niama nijakich sumnieńniaŭ, što pry sumlennym padliku hałasoŭ, biez masavych falsifikacyj volevyjaŭleńnia hramadzian, na jakija ŭ čarhovy raz pajšoŭ praviačy režym, šerah členaŭ PKB atrymali b mandaty deputataŭ Pałaty pradstaŭnikoŭ», — śćviardžajecca ŭ pastanovie.

Ideju bajkotu vybaraŭ PKB ličyć «palityčna škodnaj u sučasnych umovach». «Vyjaŭleńnie i fiksacyja masavych parušeńniaŭ biełaruskaha zakanadaŭstva stali mahčymymi tolki dziakujučy ŭdziełu ŭ vybarach tych palityčnych sił, jakija znajšli ŭ sabie siły prajści ŭsie etapy vybarčaj kampanii, niahledziačy na zaviedama niaroŭnyja ŭmovy jaje praviadzieńnia», — havorycca ŭ dakumiencie.

• 0
• 0
• 0
• 0
• 0
• 0
• 0
• 0