U vioscy Pałaniečka pad Baranavičami abvalilisia dźvie ściany pravaha flihiela pałaca Radziviłaŭ. Pra heta Svabodzie paviedamiła miascovaja žycharka Tareza Mianoŭskaja. Nichto nie paciarpieŭ.
Častka paŭnočnaj ściany pravaha flihiela abvaliłasia ŭdzień 10 krasavika, susiedniaja ścienka — na nastupny dzień. Miesca zdareńnia ahledzieli miascovyja ŭłady.
Miascovaja krajaznaŭca, historyk Kaciaryna Kazłova skazała Radyjo Svaboda, što adnoj z pryčyn abvału moža być raskolina ŭ ścianie.
«Hety kutočak byŭ padpiorty draŭlanymi taniusieńkimi belkami. Jany i tak trymalisia mo jakich 18 hadoŭ», — skazała Kaciaryna Kazłova.
Historyk dadaje, što ścieny flihiela mahli abrynucca i praz paškodžańni fundamentu.
«U hetaj častcy vielizarnyja padvały byli, i kala samaha flihiela razrytaja vielizarnaja jama. Tam raskapali padziemny pierachod. Napeŭna, razmyła hetuju jamu z fundamentam flihiela, voś jano ŭsio i ruchnuła», — skazała Kazłova.
2 krasavika budynak byłoha pałaca Radziviłaŭ u Pałaniečcy pad Baranavičami čaćviorty raz vystavili na aŭkcyjon. Pačatkovaja cana pałaca — 19 210 rubloŭ 72 kapiejki.
Namieśnica dyrektara fondu «Brestabłmajomaść» Nadzieja Stralcova skazała Svabodzie, što choć ścieny flihiela abvalilisia, pačatkovuju canu na pałac źmianšać nia buduć.
«Aŭkcyjon sa źnižeńniem cany na 80% pravodzicca nie ŭpieršyniu. Źmianšać košt bolš nielha. Pa zakanadaŭstvie možna pryznačać aŭkcyjon z pačatkovaj canoj adna bazavaja vieličynia, ale nižej za 80% źmianšać košt nielha», — skazała Nadzieja Stralcova.
Pavodle jaje słovaŭ, kali 29 traŭnia aŭkcyjon nia skončycca prodažam, Bieraściejski abłvykankam i Baranavicki rajvykankam buduć razhladać inšyja varyjanty realizacyi budynka: pradać za ekvivalent bazavaj vieličyni ci bieskaštoŭna pieradać pad investycyjny prajekt.
Pavodle ŭmovaŭ aŭkcyjonu, pakupnik pavinien pravieści restaŭracyju łota.
«Nakolki ja viedaju, častka budynka, jakaja abrynułasia, nia maje historyka-kulturnaj kaštoŭnaści», — skazała Nadzieja Stralcova.
Upieršyniu pałac byŭ vystaŭleny na aŭkcyjon u 2013 hodzie. U 2014 hodzie jaho pradali AAT «Specaktyŭbud-invest», ale firma nie zmahła zapłacić za jaho i znajści investara dla restaŭracyi, tamu ŭłady skanfiskavali siadzibu ŭ pakupnika. Aŭkcyjony ŭ 2016 i 2017 hadach nia skončylisia prodažam.
U 2017 hodzie canu na pałac źnizili suprać raniejšaj na 80%, što skłała 19 210 rubloŭ 72 kapiejki, ale nie zmahli pradać. Sioleta canu vyrašyli nie źmianšać.
Pałac, jaki ciapier maje status historyka-kulturnaj kaštoŭnaści, byŭ zbudavany ŭ XVII stahodździ jak rezydencyja Radziviłaŭ. Paśla śmierci Maćvieja Radziviła jahony syn Kanstancin pierabudavaŭ poźnieklasycystyčny pałac u styli ampir. Potym Albert Stanisłaŭ Radzivił prybudavaŭ zimovy sad u neahatyčnym styli. Pałac paciarpieŭ u Druhuju ŭsiaśvietnuju vajnu, za savieckim časam u im raźmiaścili škołu-internat.
Kamientary