Jak abudzić skuru paśla chaładoŭ — ahladajem usie mahčymyja i niemahčymyja srodki
Prahnoz nadvorja ŭsio jašče nie raduje nas ciepłynioj, ale ž viasna ŭžo ŭ pavietry. My padrychtavali ahlad srodkaŭ, jakija dapamohuć paśla zimy za karotki čas viarnuć tvaru śviežaść i «naturalnuju» [vy ž čytali vykazvańnie Dzijany Bałyka «Kali ja čuju pra naturalnuju pryhažość, ja śmiajusia ŭhołas i padaju ŭ banku z kremam»?] pryhažość.
1. Zamianicie srodak dla ŭmyvańnia na bolš miakki
Uzimku skura pakutuje ad vietru, marozu i pierapadaŭ tempieratury — u pamiaškańniach pavietra ciopłaje, ale suchoje. Pieršaje, što varta zrabić — znajści bolš miakki srodak dla myćcia. Idealna vykarystoŭvać hidrafilny alej — heta aleistaja vadkaść, jakaja rastvaraje makijaž i inšy brud, a pry kantakcie z vadoj pieratvarajecca ŭ lohkaje małačko. Taki alej nie sušyć skuru i miakka ačyščaje. Najlahčej znajści jaho ŭ karejskich brendaŭ, taksama jość u kramach Yves Rocher. Biełaruskija hidrafilnyja alei chtości chvalić, a chtości łaje. Chutčej za ŭsio, paśla karejskich srodkaŭ karystacca imi nie zachočacca, tym bolš što ŭ ich časta praciakajuć fłakony.
Alternatyva hidrafilnym alejam — micelarnaja vada abo ŭvilhatnialnaje małačko. Małačko lepš nanosić na tvar masažnymi ruchami, a tolki potym zdymać vatnym dyskam — ličycca, što tak jano pracuje lepš.
2. Vykarystoŭvajcie pilinh-skatki
Pilinh-skatka — taksama karejskaja vynachodka. Heta hiel, jaki nanosicca na skuru masažnymi ruchami. Praź niejki čas jon pačynaje źbiracca ŭ miakkija šaryki, jakija ŭbirajuć u siabie ŭvieś brud i admierłyja kletki. Idealny srodak, kab prybrać łuščeńnie sa skury. Paśla ŭvieś nastupny dohlad budzie bolš efiektyŭny.
Samyja papularnyja pilinhi-skatki — karejskija Mizon, ale biełaruskija Markell i «Bielita» taksama dobryja.
Vykarystoŭvać ich treba paśla ŭmyvańnia na suchuju skuru.
3. Prajdzicie kurs tkankavych masak
Pra tkankavyja maski viedajuć užo, napeŭna, usie. Dla adnaŭleńnia tvaru paśla marazoŭ najlepš brać uvilhatnialnyja abo pažyŭnyja maski. Ale lepš nie kuplać ich za rubiel u hipiermarkietach — cana maje značeńnie.
Dobryja maski možna znajści ŭ karejskich brendaŭ Missha, The Saem, Steblanc. Ich košt vahajecca ad 4 da 7 rubloŭ. U Steblanc cudoŭnaja maska sa ślimakovym mucynam (uvilhatniaje, siłkuje, rehienieruje skuru). Ale za hetymi maskami pryjdziecca iści ŭ admysłovyja kramy, jakija handlujuć karejskaj kaśmietykaj.
Z mas-markietu pakul najlepšaj zastajecca «Akva-bomba» ad Garnier, nabyć jaje možna ŭ luboj kramie «Miła». U biełaruskich vytvorcaŭ dobryja maski ŭ Belkosmex i «Łabaratoryi sełfi», ale prychodzicca pryznać vidavočnaje — z karejcami ŭ płanie karysnaści kankuravać nie vypadaje.
Kupicie niekalki masak (možna roznych) i vykarystoŭvajcie ich kožny dzień abo praź dzień. Paśla 3—5 masak vy ŭbačycie, što skura stała bolš śviežaj i miakkaj.
4. Pasprabujcie alhinatnyja maski
Alhinatnyja maski ŭtrymlivajuć rečyva, atrymanaje z burych vodaraściaŭ. Heta parašok, jaki treba razvodzić z vadoj. Jon stanovicca ciahučaj masaj, a paśla zastyvaje na tvary. Kožny raz takaja maska hatujecca pa novaj.
Kali vy abirajecie jaje, to lepš abzavieścisia miernaj łyžkaj (choć možna vykarystoŭvać i tuju, što zastałasia, naprykład, ad miedpreparataŭ) i śpiecyjalnym špatalem — jany mocna sprościać vam žyćcio.
Alhinaty hłyboka ŭvilhatniajuć i rehienierujuć — ličycca, što macniej za ich tolki injekcyi. Adnak vielmi važna, što pad maskaj. Śpiecyjalisty rajać nanosić pierad maskaj krem abo syvaratku, tady ich kampanienty praniknuć hłybiej u skuru. Raniej takija maski rabili tolki ŭ sałonach pryhažości, ale siońnia jany dastupnyja lubomu achvotnamu.
Alhinatnych masak na našym rynku nie šmat, niekatoryja ź ich pradajucca vialikimi pakietami, niekatoryja — tolki na adno ci vykarystańniaŭ. Samy vyhadny varyjant — kupić 240 hram maski ad karejskaha vytvorcy Anskin — usio astatniaje budzie daražej.
Jość alhinatnyja maski i ŭ inšych vytvorcaŭ, naprykład, rasijskaha Teana i biełaruskaha «Bielita».
Alhinatnyja maski rajać prymianiać kursami [10—14 dzion zapar], bo ŭ ich jość nazapašvalny efiekt.
5. Padbiarycie dobry krem
Kali vy padabrali dobry efiektyŭny dohlad dla skury, heta jašče ničoha nie značyć. Maroz i kalučy viecier mohuć źvieści ŭsie vašy vysiłki na nul. Uvilhatnieńnie i siłkavańnie patrabujuć zamacavańnia.
Pašukajcie ščylny ci pažyŭny tanalny krem, jaki budzie abaraniać skuru. Kali vam nie padabajucca ščylnyja tanalnyja tekstury, karystajciesia pažyŭnymi kremami, časta na ich jość nadpis «rich» abo «riche».
U jakaści abarončaha srodku možna vykarystoŭvać i bazu pad makijaž. U chałodnaje nadvorje «piroh» sa srodkaŭ zrobić dobruju spravu.
Ciapier čytajuć
Dla kaho sabralisia budavać vielizarny vantavy most u Minsku?3
Kamientary