Maštabnaja zabastoŭka ŭ Francyi: dziaržsłužačyja suprać skaračeńniaŭ

U Francyi miljony rabotnikaŭ dziaržsiektara prymajuć udzieł va ŭsieahulnym strajku ŭ znak pratestu suprać ekanamičnych reformaŭ prezidenta Emanuela Makrona, jakija praduhledžvajuć maštabnyja skaračeńni pracoŭnych miescaŭ, paviedamlaje VVS.

Pavialičyć

Z-za zabastoŭki ŭ Francyi nie pracujuć škoły, čyhunačny transpart pracuje ź pierabojami, tracina avijarejsaŭ była admienienaja.

Francuzski ŭrad płanuje ŭ bližejšyja piać hadoŭ skaracić 120 tysiač pracoŭnych miescaŭ u dziaržaŭnym siektary.

U vieraśni ŭ Paryžy prajšła šmattysiačnaja demanstracyja, udzielniki jakoj patrabavali ad urada admovicca ad reformy. Udzieł u strajku pryniali ŭsie dzieviać prafsajuzaŭ rabotnikaŭ dziaržsiektara, jakija pradstaŭlajuć intaresy 5,4 młn supracoŭnikaŭ. Jak padkreślili ŭ prafsajuzach, zabastoŭka kaža ab «pryncypovaj niazhodzie» z płanami Makrona.

U bujnych haradach, u tym liku ŭ Lijonie i Nancie, prajšli pratestnyja maršy.

Dva najbujniejšyja prafsajuzy Francyi — Francuzskaja demakratyčnaja kanfiederacyja pracy (CFDT) i Rabočaja siła (FO) - padtrymali praviadzieńnie zabastoŭki.

Kiraŭnik CFDT Łaran Bierhier u intervju haziecie Les Echos skazaŭ, što dziaržaŭny siektar surjozna pakutuje ad «biudžetnych abmiežavańniaŭ». «Zdajecca, urad nie ŭśviedamlaje stupień zakłapočanaści siarod dziaržsłužačych», — kaža Bierhier.

Lidar FO Žan-Kłod Mai dałučyŭsia da demanstrantaŭ u Lijonie. Pa jaho słovach, jon całkam padtrymlivaje ŭdzielnikaŭ zabastoŭki, jakija pavinny abaranić svaje pravy, status i dachody.

Vystupajučy ŭ Lijonie, Mai adznačyŭ, što «stratehija žorstkaj ekanomii» pastavić pad pytańnie isnavańnie samoha dziaržaŭnaha siektara. Pavodle jaho słoŭ, jon aścierahajecca, što balnicy i dziciačyja sady buduć pieradadzienyja pryvatnamu siektaru.

U listapadzie prafsajuzy płanujuć pravieści jašče šerah demanstracyj suprać ekanamičnych reformaŭ.

U vieraśni dziasiatki tysiač čałaviek pryniali ŭdzieł u pratestnaj akcyi ŭ Paryžy, jakaja adbyłasia adrazu paśla padpisańnia Makronam zakona, jaki spraščaje praceduru najmu i zvalnieńnia supracoŭnikaŭ. Hetuju akcyju pratestu arhanizavaŭ Žan-Luk Miełanšon, palityčny dziejač levaha tołku, jaki ličycca paśladoŭnym apanientam Makrona.

Makron, urad jakoha abiacaŭ na praciahu piaci hadoŭ skaracić ŭzrovień biespracoŭja ź ciapierašnich 9,5 da 7%, zajaviŭ, što čakaŭ supracivu novym pałažeńniam pracoŭnaha zakanadaŭstva. Na jaho dumku, pratesty mohuć praciahvacca niekalki miesiacaŭ.

Padtrymka Makrona ŭ Francyi značna źniziłasia z taho momantu, kali jon zaniaŭ prezidenckaje kresła 7 maja.

• 0
• 0
• 0
• 0
• 0
• 0
• 0
• 0