U joj — «Eciud u punsovym» i «Znak čatyroch».
U vydaviectvie «Januškievič» vyjšła treciaja kniha ź sieryi pra Šerłaka Chołmsa. U joj pad adnoj vokładkaj źmieščanyja dźvie apovieści Artura Konana Dojła — «Eciud u punsovym» i tvor, jaki daŭ knizie nazvu — «Znak čatyroch».
Tvory pra znakamitaha detektyva pierakłali na biełaruskuju movu Kaciaryna Macijeŭskaja i Hanna Jankuta.
Kniha padrychtavanaja supolna ź internet-časopisam «PrajdziŚviet» i źjaŭlajecca 13-m vydańniem ź sieryi hetaha časopisa «PostScriptum».
Apovieści «Eciud u punsovym» (1887) i «Znak čatyroch» (1890) — pieršyja tvory pra detektyva Šerłaka Chołmsa i jaho pamočnika doktara Uotsana, u jakich možna pračytać nie tolki pra ekzatyčnyja złačynstvy, ale i pra abstaviny znajomstva hierojaŭ u 1881 hodzie, ich zvyčki i sumiesny pobyt na Bejkier-stryt 221b, a taksama pra toje, što prymusiła siabroŭ u 1887 hodzie raźjechacca.
Dziejańnie ŭ pieršym tvory častkova adbyvajecca ŭ marmonskaj supolnaści ŭ štacie Juta, u druhim — u Indyi i na Andamanskich astravach.
Amataram savieckaha sieryjała apra Šerłaka Chołmsa z Vasilom Livanavym u hałoŭnaj roli apovieść «Znak čatyroch» bolš viadomaja pad nazvaj «Skarby Ahry».
Dźvie hetyja apovieści adkryvajuć cykł historyj pra Šerłaka Chołmsa i ŭvodziać čytača ŭ prydumany Dojłam śviet kryminalnych zahadak viktaryjanskaha Łondana. Abodva tvory vychodziać pa-biełarusku ŭpieršyniu.
U afarmleńni vokładki «Znaka čatyroch», raspracavanaj mastačkaj Maryjaj Muchinaj, vykarystany fotazdymak 1902 hoda, na jakim vyjaŭleny hienierał-hubiernatar Indyi Džordž Kierzan z žonkaj Mery viercham na słanie.
Raniej pa-biełarusku vychodzili dva zborniki apaviadańniaŭ z cykła pra Šerłaka Chołmsa: «Pryhody Šerłaka Chołmsa» (2014) i «Natatki pra Šerłaka Chołmsa» (2015). Pieršy zbornik źmiaščaje takija viadomyja historyi, jak «Skandał u Bahiemii», «Strakataja stužka», «Błakitny karbunkuł». Druhi ž zaviaršajecca apaviadańniem «Apošniaja sprava Chołmsa», u jakim znakamity detektyŭ sutykajecca z hienijem złačynnaha śvietu, prafiesaram Maryjarci, i ŭstupaje ź im u boj la Rajchienbachskaha vadaspadu.
Nabyć knihu možna ŭ vydavieckaj internet-kniharni januskevic.by, a taksama ŭ kniharniach Minska.
Ciapier čytajuć
U vice-śpikierki Kaardynacyjnaj rady Lizaviety Prakopčyk sabrałasia $12 tysiač daŭhoŭ109
Kamientary