Na Aŭhustoŭskim kanale pačaŭ pracu 200-hadovy soniečny hadzińnik. Pra heta BIEŁTA paviedamiŭ aŭtar restaŭracyi niezvyčajnaha abjekta hrodzienski skulptar Uładzimir Pancialejeŭ.
Soniečny hadzińnik ustanoŭleny na šluzie Vaŭkušak. Tut jaho znajšli padčas rekanstrukcyi kanała. Niahledziačy na čas, hranitny cyfierbłat — vializnaja kamiennaja hłyba z naniesienymi ličbami — niakiepska zachavaŭsia.
«My zamianili płaściny na hadzińniku, vystavili hałoŭnuju strełku. Pryjšłosia niekalki dzion čakać soniečnaje nadvorje, kab pravilna zaryjentavać jak sam hadzińnik, tak i strełku. Adznaču, što zrobleny jon byŭ vielmi jakasna, asabliva kali ŭličyć jaho ŭzrost», — adznačyŭ Uładzimir Pancialejeŭ. Pa jaho słovach, nastupnyja dni pakazali, što hadzińnik idzie dakładna. Hałoŭnaje, dačakacca soniečnaha nadvorja. Darečy, upryhožyła rarytet zastyłaja ŭ mietale lasnaja jaščarka, u budučni pobač płanujecca raźmiaścić kamień z tabličkaj pra historyju hadzińnika i kamiennuju łavu, dzie možna budzie lubavacca im i, nie śpiašajučysia, sačyć za płyńniu času.
«Hadzińnik raźmieščany ŭ adnym z samych malaŭničych miescaŭ kanała. Pobač prachodzić viełamaršrut ad punkta propusku «Lasnaja-Rudaŭka» na biełaruska-polskaj miažy da vioski Niamnova, jaki nieŭzabavie stanie dastupnym šyrokim katehoryjam turystaŭ», — adznačyŭ inicyjatar adnaŭleńnia abjekta namieśnik staršyni HA «Respublikanski turyscka-spartyŭny sajuz» Siarhiej Kalada. Jon raspavioŭ, što mima prajechać naŭrad ci atrymajecca. Abłasnoje UP «Hrodnamielijavadchaz», u čyim padparadkavańni znachodzicca Aŭhustoŭski kanał, ustalavała la šluza i hadzińnika infarmacyjnuju tabličku. Čakajecca, što 200-hadovy ekspanat dapamoža dadatkova pryciahnuć haściej rehijonu.
«Heta, chutčej za ŭsio, samy stary dziejny soniečny hadzińnik u Hrodzienskaj vobłaści. Pavodle lehiendy, ich u pačatku XIX stahodździa ŭstalavaŭ hienierał Ihnat Prandzinski, jaki adzin čas kiravaŭ pracami pa ŭładkavańni Aŭhustoŭskaha kanała, u honar kachanaj žančyny», — raspavioŭ Siarhiej Kalada.
Ciapier čytajuć
Byłoha vajskoŭca z Bresta, jaki viarnuŭsia z Polščy, abvinavacili ŭ «teraryźmie» i adpravili ŭ kałoniju2
Kamientary