Marš pamiaci «vyklatych sałdat», jaki adbyŭsia napiaredadni ŭ polskaj Hajnaŭcy, — cyničnaja pravakacyja dla nahniatańnia napružanaści pamiž biełarusami i palakami.
Pra heta havorycca ŭ kamientary staršyni Pastajannaj kamisii Pałaty pradstaŭnikoŭ pa pravach čałavieka, nacyjanalnych adnosinach i ŚMI, kiraŭnika rabočaj hrupy Nacyjanalnaha schodu Biełarusi pa supracoŭnictvie z parłamientam Polščy Andreja Navumoviča.
«Praviadzieńnie maršu, što ŭschvalaje padobnych vajennych złačyncaŭ, u Hajnaŭcy — horadzie ź biełaruskaj etničnaj bolšaściu — źjaŭlajecca, na maju dumku, cyničnaj pravakacyjaj, nakiravanaj na štučnaje raspalvańnie varožaści pamiž biełarusami i palakami, nahniatańnie napružanaści na nacyjanalnaj i kanfiesijnaj hlebie», — havorycca ŭ kamientary.
U kamientary adznačajecca, što ŭ biełaruskim parłamiencie ź vialikim škadavańniem uspryniaty naviny ab paŭtornym praviadzieńni ŭ polskim horadzie Hajnaŭka pravaradykalnaha maršu z metaj hieraizacyi asobnych dziejačaŭ polskaha padpolla 1940—1950-ch hadoŭ, viadomych jak «praklatyja sałdaty».
«Nielha ihnaravać histaryčnuju praŭdu ab tym, što na sumleńni niekatorych z hetych dziejačaŭ — dziasiatki mirnych žycharoŭ Padlašša, jakija byli źniščany tolki tamu, što naležali da biełaruskaha etnasu. U pryvatnaści, liču, što nie lišnim budzie nahadać, što adzin z takich «palavych kamandziraŭ» — Ramuald Rajs pa mianušcy Bury — addaŭ zahad ab źniščeńni 60 biełaruskich viosak, u tym liku pra spaleńnie žyŭcom žycharoŭ vioski Zalašany», — skazaŭ Andrej Navumovič. Jon dadaŭ, što orhanami sudovaj ułady Polščy dziejańni Ramualda Rajsa byli aficyjna pryznanyja hienacydam.
«Razumiejučy, što dadzienaje mierapryjemstva prachodzić nasupierak mierkavańniu aficyjnych uładaŭ Respubliki Polšča, zaklikaju polskich kalehaŭ-parłamientaryjaŭ da kateharyčnaha asudžeńnia takich pravakacyj i supraćdziejańnia im u dalejšym», — skazaŭ parłamientaryj.
Ciapier čytajuć
Minsk, Varšava, Vilnia — paraŭnoŭvajem, dzie praściej kupić kvateru čałavieku ź siaredniaj zarpłataj1
Kamientary