Nadzvyčajny i paŭnamocny pasoł Biełarusi ŭ Rasii Ihar Pietryšenka siońnia ŭ efiry prahramy «Vriemia pokažiet» na rasijskim Pieršym kanale kateharyčna abvierh publikacyi ŭ asobnych ŚMI ab tym, što Biełaruś maje namier vyjści ź intehracyjnych abjadnańniaŭ, pieradaje BIEŁTA.
Dypłamat zajaviŭ, što Biełaruś była i zastajecca aktyŭnym udzielnikam Sajuznaj dziaržavy, Jeŭrazijskaha ekanamičnaha sajuza i Arhanizacyi Damovy ab kalektyŭnaj biaśpiecy.
Prahrama była pryśviečanaja zahadu FSB Rasii ab ustanaŭleńni pamiežnaj zony na miažy ź Biełaruśsiu, publikacyjach u ŚMI ab vychadzie Biełarusi ź intehracyjnych abjadnańniaŭ, a taksama ŭviadzieńniu Biełaruśsiu piacidzionnaha biaźvizavaha režymu dla hramadzian 80 dziaržaŭ.
Ihar Pietryšenka padkreśliŭ, što biełaruskija pamiežniki ŭ ciesnym kantakcie z rasijskimi kalehami nadziejna abaraniajuć źniešni pierymietr Sajuznaj dziaržavy. Jon nahadaŭ, što pamiž dźviuma krainami zaklučanyja adpaviednyja mižnarodnyja pahadnieńni. Adno ź ich padpisana ŭ 2015 hodzie, jano tyčycca vykarystańnia adzinaj bazy danych asob, jakim zabaronieny ŭjezd na terytoryju Sajuznaj dziaržavy. Pa słovach pasła, 90% hetaha śpisu — heta asoby, jakim zabaronieny ŭjezd u Rasiju. «Biełaruskija mihracyjnyja i pamiežnyja słužby nadziejna vykonvajuć hetyja abaviazacielstvy», — skazaŭ dypłamat.
Ihar Pietryšenka zajaviŭ, što dla Rasii niama nijakich ryzyk u suviazi z uviadzieńniem Biełaruśsiu piacidzionnaha biaźvizavaha režymu. «My dali tłumačeńni ŭ FSB i ŭ MZS Rasii, i ni ŭ kaho z hetych struktur, u pravaprymianialnikaŭ nie było pytańniaŭ da nas pa hetym ukazie», — adznačyŭ jon.
Pasoł dadaŭ, što vaśmidzienny biaźvizavy režym ustalavany pry ŭjeździe va Uładzivastok, trochdzionny — pry ŭjeździe zamiežnikaŭ u Sankt-Pieciarburh. «Heta značyć, Rasijskaja Fiederacyja raniej pajšła pa hetym šlachu, uvioŭšy biaźvizavy režym dla aktyvizacyi biznesu, turyzmu», — padkreśliŭ jon.
Kamientary