U Minsku zaćvierdžanyja taryfy na pasłuhi ŽKH

U stalicy zaćvierdžanyja taryfy na žyllova-kamunalnyja pasłuhi. Adpaviednaje rašeńnie Minskaha haradskoha vykanaŭčaha kamiteta ad 9 studzienia № 51 apublikavanaje na Nacyjanalnym pravavym internet-partale.

Pavyšajucca taryfy jak na subsidavanyja dziaržavaj pasłuhi, tak i na fiksavanyja, jakija zabiaśpiečvajuć poŭnaje kampiensavańnie vydatkaŭ nasielnictvam.

U pryvatnaści taryf na techničnaje absłuhoŭvańnie žyłoha doma składzie 0,1 rubla za kvadratny mietr u vypadku, kali jon subsidujecca, i 0,1155 — pry poŭnym kampiensavańni.

Taryf na vodazabieśpiačeńnie zaćvierdžany ŭ 0,5301 rubla za kubičny mietr, kali jon subsidujecca, i 0,7638 — kali žychary spažyvajuć vadu zvyš narmatyvu i pačynajuć kampiensavać zatraty całkam.

Taryf na vodaadviadzieńnie (kanalizacyju) za kubičny mietr składzie adpaviedna 0,354 i 0,5103 rubla. Techničnaje absłuhoŭvańnie lifta z čałavieka ŭ miesiac budzie kaštavać 1,19 i 1,33 rubla.

Taryf na kapitalny ramont žyłoha doma za kvadratny mietr ahulnaj płoščy składzie 0,088 rubloŭ.

Jak raniej paviedamlałasia, Saviet ministraŭ pastanovaj ad 16 śniežnia 2016 hoda № 1035 zaćvierdziŭ miežavyja pamiery cen (taryfaŭ) na žyllova-kamunalnyja pasłuhi na 2017 hod, zychodziačy ź jakich miascovyja orhany ŭłady ŭstaloŭvajuć łakalnyja taryfy.

Košt ciepłaenierhii pavialičany na 17% da 15,6098 rubla za 1 Hkał. Na anałahičny pracent vyrasła dla nasielnictva cana na pryrodny haz u aciaplalny pieryjad. Košt elektraenierhii nie pavialičyŭsia.

Pry pavieličeńni taryfaŭ raźlikovyja płaciažy siamji z troch čałaviek, jakaja žyvie ŭ typavoj dvuchpakajovaj kvatery, pry narmatyŭnym spažyvańni pasłuh (pa asnoŭnych i dadatkovych pasłuhach) pavinny ŭzraści na 10,98 rubla i skłaści ŭ aciaplalny pieryjad 79,38 rubla.

Pastanovaj rekamiendavana abłvykankamam i Minharvykankamu zabiaśpiečyć pamiery raschodaŭ nasielnictva za sanitarnaje ŭtrymańnie dapamožnych pamiaškańniaŭ žyłoha doma nie bolš jak 0,53 rubla z adnaho čałavieka ŭ miesiac, techničnaje absłuhoŭvańnie zaporna-pierahavornych pryład žyłoha doma — nie bolš jak 0,91 rubla z adnoj kvatery ŭ miesiac. Hetyja taryfy zastalisia na raniejšym uzroŭni.

Ministerstvu antymanapolnaha rehulavańnia i handlu daručana ŭzhadnić z abłvykankamami i Minharvykankamam subsidavanyja dziaržavaj taryfy: na vodazabieśpiačeńnie — nie bolš jak 0,5301 rubla za 1 kub. m (ciapier 0,2790 rubla); na vodaadviadzieńnie (kanalizacyju) — nie bolš jak 0,354 rubla za 1 kub. m (0,1863 rubla); na techničnaje absłuhoŭvańnie žyłoha doma — nie bolš jak 0,1 rubla za 1 kv. m ahulnaj płoščy žyłoha pamiaškańnia ŭ miesiac (0,0995 rubla); na techničnaje absłuhoŭvańnie lifta — nie bolš jak 1,19 rubla z adnaho čałavieka ŭ miesiac (0,6911 rubla).

Taryfy na vodazabieśpiačeńnie, vodaadviadzieńnie (kanalizacyju), techničnaje absłuhoŭvańnie žyłoha doma, jakija zabiaśpiečvajuć poŭnaje kampiensavańnie ekanamična abhruntavanych zatrat, u paraŭnańni ź minułym hodam nie źmianilisia. Taryf na techničnaje absłuhoŭvańnie lifta pavinien skłaści nie bolš jak 1,33 rubla z adnaho čałavieka ŭ miesiac (u 2016 hodzie — 1,2 rubla).

***

U kancy listapada 2016 hoda vice-premjer Anatol Kalinin zajaviŭ, što sa studzienia taryfy na pasłuhi ŽKH vyrastuć na piać dołaraŭ u ekvivalencie i inšych płanaŭ va ŭrada na siońniašni dzień niama. Norma ab piacidołaravym štohadovym pavyšeńni taryfaŭ na žyllova-kamunalnyja pasłuhi zamacavanaja va ŭkazie prezidenta № 555 ad 5 śniežnia 2013 hoda.

Kompleksam mier pa realizacyi prahramy sacyjalna-ekanamičnaha raźvićcia na 2016—2020 hady, jaki byŭ zaćvierdžany pastanovaj Savieta ministraŭ № 18 ad 12 studzienia 2017 hoda, praduhledžana, što ŭ 2017 hodzie taryfy na žyllova-kamunalnyja pasłuhi dla nasielnictva pavinny pavysicca da 75% ad uzroŭniu ich poŭnaha kampiensavańnia, a ŭ 2018-m — da 100%.

• 0
• 0
• 0
• 0
• 0
• 0
• 0
• 0