U konkursie junkaraŭ haziety «Pieriechodnyj vozrast» pieramahli teksty pra Danbas
Niadaŭna biełaruskaja hazieta dla moładzi «Pieriechodnyj vozrast» pravodziła konkurs dla junych karespandentaŭ.
Tema — «Junyja žurnalisty za mir i siabroŭstva».
Na konkurs dasłali kala 1500 listoŭ. Uvohule, tyraž haziety mizerny — usiaho kala 2800 asobnikaŭ. Ale konkurs pravodziŭsia pry spryjańni Ministerstva adukacyi i BRSM, tamu ŭdzielnikaŭ mabilizavali škoły.
U tekstach, jak piša hazieta, školniki «dzialilisia pieražyvańniami z nahody siońniašniaj mižnarodnaj abstanoŭki; pryvodzili prykłady dobrasusiedstva, palityčnaj i narodnaj dypłamatyi; spasyłalisia na ŭspaminy vieteranaŭ, udzielnikaŭ uzbrojenych kanfliktaŭ; raskazvali pra siabroŭstva dziaciej roznych kantynentaŭ».
Na cyrymoniju ŭznaharodžvańnia, što adbyłasia ŭ Minsku 16 śniežnia, zaprasili pradstaŭnikoŭ niekalkich pasolstvaŭ: Rasii, Ukrainy, Polščy i Kazachstana.
I ŭžo tam stała viadoma, chto pieramožcy.
Pieršaje miesca žury prysudziła školniku z Mastoŭ za tekst, u jakim toj pierakazvaŭ historyju pra chłopčyka z Danbasa, pačutuju ŭ rasijskich ŚMI.
Druhaja łaŭreatka, dziaŭčynka, pajšła jašče dalej i napisała list prezidentu Ukrainy: «Chopić bambić Danbas».
Pradstaŭnica ŭkrainskaha pasolstva nie vytrymała i dalikatna źviarnuła ŭvahu arhanizataraŭ, što vusnami dziaciej tranślujucca śćvierdžańni, jakija nie adpaviadajuć rečaisnaści.
«Ja dadała, što siońnia nieabchodna źviartać uvahu na prafiesijnuju etyku žurnalistaŭ, ich abjektyŭnaść», — skazała «Našaj Nivie» pieršy sakratar pasolstva Ukrainy Maryja Hucała.
Inšy prysutny na cyrymonii pažartavaŭ: «Moža, usio ž list treba adrasavać nie prezidentu Ukrainy, a prezidentu Rasii?»
U samoj haziecie nam skazali, što nie imknulisia kahości pakryŭdzić.
«Tema była pra dziaciej, jakija chočuć žyć u miry. Palityčnych pytańniaŭ my nie chacieli čapać — tolki tvorčaść. U žury byli viadomyja ludzi», — skazała «Našaj Nivie» Iryna Łondar, juryskonsult redakcyi «Pierachodny ŭzrost».
Toje, što ŭ lik pieramožcaŭ trapili sačynieńni, jakija adnabakova pierakazvali padziei, źviazanyja sa sprobaj pieradziełu miežaŭ Ukrainy, zaležała ad voli žury. A ŭ žury ŭvachodzili. jak nam stała viadoma, pradstaŭniki Ministerstva adukacyi, BRSM, Biełaruskaha sajuza žurnalistaŭ (aficyjnaha) i Instytuta žurnalistyki BDU.
Kamientary