Brazilski futbalist Ałan Rušel, jaki vyžyŭ u listapadaŭskaj katastrofie samalota ŭ Kałumbii, raspavioŭ žurnalistam, što ŭ apošni momant pierad krušeńniem łajniera pierasieŭ na inšaje miesca ŭ sałonie, piša VVS.
Pa słovach futbalista, jaho miesca było ŭ chvaście samalota, ale tavaryš pa kamandzie — bramnik Džeksan Fołman — uhavaryŭ Rušela pierasieści bližej da jaho ŭ piaredniuju častku sałona.
U vyniku krušeńnia pasažyrskaha samalota BAE Avro, na borcie jakoha znachodziłasia brazilskaja futbolnaja kamanda «Šapiekaense», zahinuŭ 71 čałaviek, vyratavacca zmahli tolki šeść čałaviek — u ich liku Ałan Rušel i hałkipier Džeksan Fołman, jakomu amputavali nahu.
Ałan Rušel zastajecca ŭ balnicy z traŭmaj śpiny. Pavodle jaho słoŭ, jon spadziajecca znoŭ vyjści na futbolnaje pole, a adrazu paśla viartańnia z balnicy — naviedać siemji zahinułych futbalistaŭ.
Ź jaho słoŭ, jon nie pamiataje, jak adbyłosia krušeńnie, ale pamiataje, što admaŭlaŭsia pamianiacca miescami z žurnalistami, jakija chacieli siadzieć razam u chvaście sałona.
«Ja nie chacieŭ [mianiacca], ale potym ubačyŭ Fołmana, i jon nastajaŭ na tym, kab ja pierasieŭ bližej da jaho», — raspavioŭ Rušiel.
28 listapada 2016 hoda samalot, jaki pieravoziŭ futbalistaŭ FK «Šapiekaensa» na pieršy finalny matč Paŭdniovaamierykanskaha kubka-2016 suprać kłuba «Atletyka Naśjanal», paciarpieŭ krušeńnie ŭ hornaj miascovaści niedaloka ad horada Medelina na poŭnačy Kałumbii. U vyniku avijakatastrofy zahinuła vialikaja častka kamandy, u tym liku jaje kapitan Klebier Santana i ŭsie členy trenierskaha štaba.
Vyžyli ŭ katastrofie šeść čałaviek, ź ich — troje futbalistaŭ «Šapiekaense»: Ałan Rušel, Zampjer Neta, Džeksan Fołman. Bramnik Markas Daniła Padylja byŭ znojdzieny žyvym, ale paźniej pamior u balnicy. Taksama ŭ katastrofie vyžyli dvoje členaŭ ekipaža i žurnalist.
«Tolki Boh moža rastłumačyć, čamu ja vyžyŭ u katastrofie. Jon schapiŭ mianie i daŭ mnie druhi šaniec», — skazaŭ Rušel, adkazvajučy na pytańni žurnalistaŭ u balnicy.
U pačatku śniežnia ŭłady Kałumbii zajavili, što avijakatastrofa adbyłasia z-za taho, što ŭ samalota BAE Avro skončyłasia paliva. Raniej u ŚMI trapiŭ zapis pieramoŭ piłota samalota i kałumbijskaha avijadyśpietčara. Na zapisy piłot niekalki razoŭ prosić dazvołu na pasadku z-za admoŭ elektrapryboraŭ i niedachopu paliva.
Kamientary