Dźvie premjery čakajuć biełaruskich turystaŭ letam 2017 hoda. Jak raspaviali Tio.by u firmie «Aeratrevieł», jakaja kansaliduje čartary ź biełaruskaj stalicy na roznyja kurortnyja jeŭrapiejskija napramki, u nastupnym siezonie ź Minska možna budzie palacieć u italjanski Tryjest i ałbanskuju Tyranu.
Prylot u Tryjest dazvolić arhanizavać adpačynak na Vieniecyjanskaj Ryŭjery, dzie raźmieščany takija papularnyja siarod biełaruskich turystaŭ kurorty, jak Lido-dy-Jezoło, Tryjest, Lińjana i inšyja. Akramia taho, čartar daść mahčymaść ažyćciavić tranśfiery na kurorty Słavienii i Charvatyi.
Nahadajem, što letaś ź Minska kampanija «AeraBiełServis» kansalidavała čartar na Sicyliju, a «Hulivier» lotaŭ u Rymini. Rehularny rejs «Biełavija» ŭ Nicu dazvalaŭ našym turystam lohka dabracca na jašče adno papularnaje italjanskaje ŭźbiarežža — u Lihuryju.
Navinkaj siezonu nastupnaha hoda stanie čartar u Tyranu — stalicu Ałbanii. Pra mahčymaści hetaha biaźvizavaha dla biełarusaŭ napramku rynak viedaje daŭno, i hałoŭnyja nadziei źviazvaje ź jaho tannaściu i pry hetym dobraj hatelnaj infrastrukturaj i vydatnymi piaščanymi plažami, jakija nie sastupajuć bałharskim. Ahiencki rynak nie tak detalova raźbirajecca ŭ tonkaściach hatelnaj infrastruktury Ałbanii, jak, skažam, susiedniaj Čarnahoryi, tamu ŭ mai płanujecca niekalki rekłamnych turaŭ dla znajomstva z ałbanskim kurortami i hatelami.
Miarkujecca, što čartarny łancužok u Ałbaniju budzie dziesiaci- i adzinaccacidzionnym — z červienia pa vierasień. Čartar u Tryjest, pa płanach, budzie startavać u červieni kožny tydzień na bartach 122-miascovaha «Boinha», zatym u pik siezonu — u druhoj pałovie lipienia-žniŭni, kali ŭ italjancaŭ vakacyi i miescaŭ u hatelach nie chapaje, — biełaruski kansalidatar piarojdzie na dziesiacidzionnyja vylety na 76-kresielnych «Embrajerach», a zatym, u aksamitny siezon, łancužok znoŭ budzie ažyćciaŭlacca na «Boinhach» raz na tydzień.
Ciapier čytajuć
Usie čakali padzieńnia cen, ale ničoha padobnaha! Jak za hod źmianilisia ceny na kvatery ŭ Minsku i inšych bujnych haradach8
Kamientary