U aktavuju zału kaledža Cichvina ŭ Leninhradskaj vobłaści Rasii padčas ŭsieahulnaha zboru studentaŭ uvarvalisia terarysty z aŭtamatami i šachidki, abmatanyja vybuchoŭkaj. Navučency da apošniaha nie viedali, što ŭsio, što adbyvajecca — heta ŭsiaho tolki vučeńni pa biaśpiecy, arhanizavanyja miascovym patryjatyčnym kłubam.
U supołcy Ukantakcie, pryśviečanaj navinam horada Cichvin Leninhradskaj vobłaści, prakaciłasia chvala abureńnia. Padstavaj pasłužyŭ post pra vučeńni ŭ miascovym miedycynskim kaledžy.
«Studentaŭ sabrali ŭ aktavaj zale, paśla čaho tudy ŭvarvalisia ludzi ŭ maskach i z zbrojaj. Siarod ich była žančyna, apranutaja jak šachidka i abmatanaja vybuchoŭkaj. Praź niekatory čas jana skazała, što adlik pajšoŭ, i pačała malicca. Było zroblena niekalki strełaŭ u pavietra, ludzi byli ŭ šoku. Chtości isteryŭ, kahości stavili tvaram da ściany, telefanavać nie davali. Kali adna sa studentak admoviłasia addać telefon, druhomu studentu prystavili duła da skroni i skazali, što zastrelać, kali jana nie spynić», — piša aburanaja žycharka.
Paviedamleńnie prailustravana dvuma fotazdymkami. Na adnym ź ich mužčyna sa zbrojaj idzie pamiž šerahaŭ sa studentami, na druhim — žančyna ŭ čornym z mulažom vybuchoŭki na pojasie.
Pry hetym, pa słovach aŭtara paviedamleńnia, dyrektar miedkaledža nie prysutničaŭ na hetym mierapryjemstvie razam sa svaimi studentami i kalektyvam. Supracoŭniki adukacyjnaj ustanovy spačatku nie padazravali, što heta ŭsiaho tolki vučeńni.
Pa słovach krynicy ŭ administracyi horada, 3 śniežnia ŭ Cichvinskim miedycynskim kaledžy pa rasparadžeńni Kamiteta pa moładzievaj palitycy Leninhradskaj vobłaści sapraŭdy byli praviedzieny mierapryjemstvy pa biaśpiecy žyćciadziejnaści. Hramadskaja arhanizacyja «Centr vajenna-patryjatyčnaha vychavańnia «Patryjot» praviała zaniatki z udziełam svaich supracoŭnikaŭ, pierapranutych u terarystaŭ. Studentam kaledža nahladna pakazali, jak mohuć vyhladać terarysty, ich zbroja i dziejańni, a taksama raspaviali, jak pavodzić siabie ŭ padobnych situacyjach, kab paźbiehnuć achviar.
Ciapier čytajuć
Čamu YouTube vydaliŭ kanały BiełTA, STB i ANT? Voś što viadoma11
Kamientary